Türkiyede İslâm İşbirligi Teşkilâtınıñ Tış işler nazirleri Şurasınıñ sessiyasında qırımtatarlarnen bağlı rezolütsiya qabul etildi. Bu vesiqa qırımtatar halqınıñ aq-uquqları vaziyetini nezaret etmek içün imkânlarnı aça.
Qırımtatar Milliy Meclisiniñ reisi Refat Çubarov bunı bildirdi.
Vesiqanıñ esas noqtalarından biri — Rusiyeden siyasiy sebeplerden azatlıqtan marum etilgen qırımtatar halqınıñ mabüslerini acele azat etmesini talap etmektir.
"Rezolütsiyada (belli ki, Rusiyege) siyasiy sebeplerden azatlıqtan marum etilgen apiske alınğan qırımtatarlarnı acele azat etmege çağıralar. Rezolütsiya İİTnıñ Baş kâtibiniñ ve teşkilâtnıñ diger institutlarınıñ qırımtatar halqınıñ aq-uquqları vaziyetini nezaret etüv ve tedqiq etüvde iştirak etüv imkânlarını aça", — dep Refat Çubarov Facebookta yazdı.
Aynı zamanda, Refat Çubarov qayd etti ki, rezolütsiyada Rusiye Federatsiyasınıñ areketlerini takbih etmek içün açıq ve doğru sözler yoq. Onıñ fikrince, bunıñ sebebi, İİTnıñ aza devletleriniñ bir qısmı Rusiye istilâsını açıqtan takbih etmekten qaçınalar.
"Böylece, Qırımtatar Milliy Meclisi, Rusiye tarafından işğal etilgen Qırımda tamır qırımtatar halqınıñ taqip etilmesinen bağlı kerçek vaziyetni añlamaq içün, İİTnıñ aza devletlerinen işbirlikni quvetleştirmeli", — dep Çubarov qoştı.
Hatırlatamız ki, 2025 senesi ilk yaz ayınıñ 22-nde İstanbulda İslâm İşbirligi Teşkilâtınıñ Tış işler nazirleri Şurasınıñ eki künlik sessiyası yüklendi. Sessiyanıñ işiniñ qısmı, şu cümleden rezolütsiyanıñ ve İİTnıñ Tış işler nazirleri Şurasınıñ başqa qararlarınıñ qabul etilmesi, qapalı rejimde olıp keçti. Anda tek nazirler ve yardımcıları iştirak ettiler.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
