Vaqtınca işğal etilgen Sevastopolda (AqyarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki adda) bütün bir qoranta ğayıp oldı. Rusiye quvetçileri eşler Oleğ ve Natalânı hırsızladı, olarnıñ 9 yaşında balasını ise bala evine alıp kettiler. Ana-babanıñ bulunğan yeri belli degil, balasına ise iç bir şey aytmağa imkân berilmey.
Qırımtatar maaliy merkeziniñ reisi Eskender Bariiev bunı bildirdi.
"Ana-babanı hırsızlap, balalarnı öksüz qaldırğanlar acele areket etmek kerekler. Aile ve yaqınları şaşmanen yaşaylar, tuvğanları qayda, sağlarmı, ne sebepten tutuldılar ve ne qabaatlanalar, bilmeyler. Aynı zamanda olar balalarınıñ bala evine kirgenine şaştılar", — dep Bariiev qayd etti.
Çiçek ayınıñ 9-nda Natalâ balasını Sevastopolda (Aqyarda) mektepke alıp ketti. Ekinci dersten soñ mektep müdirine telefon ettiler: ana-babası kelmeycek, balanı polis hadimi alacaq. Onı evge alıp kettiler. O vaqıttan berli Natalâ kimse tarafından körünmedi.
Aynı şu künü Oleğ ketken Alupka şeerinde onı sekiz FSB hadimi tuttı. Onıñ silâsını belli olmağan yerge alıp kettiler. O çalışqan şirketniñ müdiri, Oleğniñ "siyasiy sebeplerden" tutulğanı aqqında haber aldı, izaat bermedi.
Natalâ ve Oleğniñ telefonları cevap bermey, lâkin ara-sıra aqşamları onlayn olalar.
"Tutulğanlarnıñ balası başından keçirgeni şeyni tasavvur etmek bile qıyın. "Meni mından ne vaqıt alacaqlar?", "Men ne vaqıt evge qayta bilem?", "Ana-babam qayda ve men ne içün mında?", dep sorasalar, oña bir şey bilmeyceklerini ya da ana-babasınıñ statusını belgilemege eñ az 6 ay qalacaqlarını aytalar... ve başqa bir şey aytmaylar", — dep Bariiev qoştı.
Uquq qorçalayıcınıñ qayd etkenlerine köre, bu dava — Rusiye Federatsiyasınıñ qorantalarnı dağıtqanı, balalarnı izolâtsiya etkenini ve olarnı ruslar tarafından evlâtlıqqa almağa azırlağanını köstere.
"Rusiye-terror rejiminiñ cezasız qalması er sefer yañı bir yamanlıq doğura. Bizler bu davanı diqqatnen nezaret etecekmiz ve tek Ukrayinada degil, bütün dünyada onı aydınlatmaq içün elimizden kelgenini yapacaqmız. Şimdiki vaqıtta Qırımtatar Maaliy Merkezi BMTnıñ Zorbalıq ve mecburiy olmağan ğayıp oluvlar iş gruppasına, em de diger halqara mehanizmlerge vesiqalarnı azırlay", — dep Bariiev qayd etti.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
