İşğal etilgen Qırımda Yevpatoriya (KezlevRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad) şeerinde "Rusiye İçki işler nazirliginiñ aşırıcılıqnen küreş merkezi"niñ hadimleri yerli işğalli OMVD hadimlerinen birlikte 65 yaşında yerli sakinni tuttılar. O, çoq qatlı evler yanındaki skemleler, meydanlar ve raatlıq yerlerinde cenkke qarşı yazılarnı qoyğanında qabaatlana.
İşğalli Qırım İçki işler nazirligi bunı bildirdi.
İşğalli polisniñ bildirgenine köre, yazılar "memleket reberliginiñ siyasiy yönelişine qarşı malümat bergen edi". RF quvetçileriniñ fikirince, bu şiarlar "vandalizm" edi ve cemaat nizamına telüke teşkil ete edi.
İşğalli akimiyet adamnı "vandalizm" içün qabaatladı. Tahqiqat bildirdi ki, o "öz qabaatını tanıdı". Oña qırçalayıcı tedbir endi alındı — bazı areketlerini, hususan, alâqalar, areketler ve açıq çıqışlar yasaq ettiler.
Hatırlatamız ki, Ukrayina prezidentiniñ Qırım Muhtar Cumhuriyetindeki temsilciligi qayd etti ki, işğalli Qırım mahkemelerine ve diger "memuriyet" organlarına "Rusiye ordusınıñ itibarını tüşürüv" maddesine binaen 1 350 dava berildi.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
