Mayısnıñ 16-nda "Umma" Ukrayina musulmanları diniy idaresiniñ camilerinde Qırımtatar halqınıñ sürgünliginiñ 81 yıllığına bağışlanğan dualar ötkerildi. Soyqırım neticesinde elâk olğanlarnıñ hatırasını añdılar.
Kıyivde dua ve hatıra tedbirine 200-den çoq insan keldi, dep "Umma" Ukrayina musulmanları diniy idaresiniñ yolbaşçısı Dilâver Saidahmetov bildirdi.
İştirakçiler arasında talebeler, siyasetçiler, arbiyler ve diplomatik korpus temsilcileri bar.
"Bu bizim borcumızdır: er yıl şu hatırlav künlerinde biz vaqialarnı hatırlaymız. Bu bizim ecdatlarımıznıñ, babalarımıznıñ, atalarımıznıñ ikâyesidir. Bu sene daa çoq insannı celp etmek içün daa açıq tedbir keçirmege qarar aldıq, çünki sıq-sıq böyle ola, bu vaqialar aqqında tek Qırımtatarlar bileler, diger millet vekilleri ise — pek az bileler", — dep qayd etti o.
"Umma" Ukrayina musulmanları diniy idaresiniñ müftisi Murat Süleymanov, bugün sürgünlik aqqında hatırlamaq pek müim olğanını qayd etti.
"Ve şimdi, daa da çoq, bunı hatırlamaq kerekmiz — ve tek hatırlamaq degil de, areket etmek kerekmiz. Amma Qırımtatarlar olaraq yapmaq kerek olğanımız eñ müim şey — küçümizge, devletçiligimizniñ, medeniyetimizniñ ve, teessüf ki, ğayıp etilgen er şeyniñ qaytarıluvına olğan işançımıznı ve ümütimizni coymamaq kerekmiz", — dedi o.
Bundan da ğayrı, tedbirde Qırımtatarlarnıñ sürgünlikten soñ yarımadağa qaytması mevzusında fotoresimci Arvidas Şemetasnıñ eserleri numayış etildi.
"90-ıncı yıllarnıñ başından berli — cami qurucılığı, binalarnıñ ğayrıdan tiklenüvi, küreş tarihı: mayısnıñ 18 künü Qırımda eñ çoq insan toplanğan mitinglerniñ resimleri bar. Biz daa çoq fotoresim topladıq, amma tahminen 20-sini saylap aldıq: sürgünlik büyük facia olğanından ğayrı, başqa bir qısım bar — ümüt bergen bir qısım", — dep Dilâver Saidahmetov qoştı.
Bundan ğayrı, Lviv, Çernivtsi ve Zaporijjâ imamları ve din cemiyetleri ortaqlarınen beraber öz şeerlerinde hatıra tedbirlerini keçirmege azırlanalar, dep "Umma" Ukrayina musulmanları diniy idaresi bildirdi.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
