Avstriyanıñ federal kantsleri Kristian Ştoker, onıñ memleketi Qırımnıñ işğaline razı olmağanını ve Ukrayinanıñ topraq bütünligine sadıq olğanını bildirdi.
O, mayısnıñ 6-nda Viyanadaki "Ukrinform"ğa bergen izaatında bunı bildirdi.
"Qırım aqqında aytsaq, vaziyet böyle: biz bu işğalni tanımadıq, umumen Avropa Birligi kibi. Şunıñ içün bizler içün Ukrayinanıñ topraq bütünligi şübe doğurmaz", — dep Ştoker Amerika yetekçisi Donald Trampnıñ "Qırım Rusiyenen qalacaq" degen beyanatlarına izaatladı.
Onıñ aytqanına köre, "Ukrayinanıñ Qırım yarımadası meselesine munasebeti er vaqıt Ukrayina qararına bağlıdır".
AQŞ ne dey
AQŞ prezidentiniñ muavini Cey Di Vens jurnalistlerge aytqanı kibi, AQŞ "Ruslar ve Ukrayinlilerge pek açıq bir teklif berdi, ve ya olar "ebet" deseler, ya da Qoşma Ştatları bu esnasnı terk eter".
Onıñ aytqanına köre, soñki adım olmasa da, soñki adımlardan biri yapmağa vaqıt keldi, yani taraflar "öldürüvlerni toqtatacaqlarını, topraq sıñırlarını bugünki seviyesine yaqın bir seviyede buzlatacaqları"nı açıq şekilde bildirmeliler.
Ukrayinanıñ nazar noqtası
Çiçek ayınıñ 22-nde jurnalistlernen subetleşkende prezident Volodımır Zelenskıy, Ukrayina bildirdi ki, Rusiye tarafından vaqtınca işğal etilgen topraqlarını deñiştirüv ya da red etüv meselesinde resmiy teklifler almadı — şimdilik tek haber vastalarında peyda olğan malümat aqqında söz yürsetile. Aynı zamanda Ukrayina iç bir vaqıt Rusiye Federatsiyasınıñ Qırım işğaline uquqiy şekilde tanımaycaq, çünki bu Anayasağa ve devlet suverenitetine zıt kele.
"Ukrayina Qırımnıñ işğalini qanuniy olaraq tanımay. Bu bizim toprağımız, Ukrayina halqınıñ toprağıdır. Bu mevzuda laf etmege aqqımız yoq — bu anayasamıznıñ tışındadır", — dedi Zelenskıy.
Devlet yolbaşçısınıñ aytqanına köre, Qırım ve Rusiyeniñ vaqtınca işğal etken diger topraqları meselesiniñ muzakere etilmesi cenkniñ uzatılmasına ketire.
O şunı da bildirdi ki, ateş toqtatılğan soñ Ukrayin tarafı "er angi şekil"de muzakere masalarına oturmağa azır.
Avropa Birligi AQŞnı Qırımnıñ Rusiyege aitligini tanımamağa çağıra
Avropa Birliginiñ baş diplomatı Kaya Kallas Vaşingtonnı işğal etilgen Qırımnıñ Rusiye qısmı olaraq tanılması Kremlniñ faydasına olacaq bir hata olacağı aqqında tenbiyeledi.
O qoştı ki, AB 2014 senesi işğal etilgen yarımadanı Rusiye toprağı olaraq iç bir vaqıt tanımaycaq.
"Qırım — bu Ukrayina. Diger memleketler Qırımnı Rusiye olaraq tanımamaları — işğal altındaki insanlar içün bu pek müimdir", — dep qayd etti o.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
