Qırımnıñ Nıjnöğirsk (şimdi Biloğirsk — QarasuvbazarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad) rayonınıñ işğalli prokurorlığı Biloğirsk "tahqiqat bölügi"ne advokat Emil Kurbedinovnıñ muracaatını yolladı, o, siyasiy mabüs Vadım Siruknıñ apayı Anna Boğaçovanı ziyaret etkende "polis"ni vekâletlerini aşqanında qabaatladı.
Çiçek ayınıñ 25-nde advokat, "Qırım birdemligi" cemaat teşkilâtına bunı bildirdi.
Advokatqa cevap olaraq "prokuror" onıñ muracaatınıñ kopiyasını İşğalli Tahqiqat eyyetine yollağanını bildirdi, çünki müessiseler, "yazılı muracaatta qoyulğan meselelerniñ çezilüvi bir qaç devlet organınıñ vekâletine ait olsa", arizanıñ muracaatınıñ kopiyasını diger akimiyet organlarına ya da quvet strukturalarına yollay bileler.
Çiçek ayınıñ 3-nde polis hadimleri Boğaçovanıñ evine Rusiye teşviqatçısı Aleksandr Fedorçaknıñ mezarını ateşke berüv davası boyunca keldi. Qadınnıñ aytqanına köre, quvetçilerden biri onı qorquzıp, olarnen beraber ketmege talap etti. Boğaçova red etti, bölükke advokatnen beraber kelmege vade etti. Onıñ yerine polis hadimi onı olarnen "aralarnı bozmasın" dep tenbiyeledi, aks alda nevbetteki ziyaretinde tintüv yapılacaq.
Kurbedinovnıñ qayd etkenine köre, polisniñ areketlerinde siyasiy sebepler bar.
"Er kes, hususan quvetç organları, Vadım ve oña beñzer mabüsler siyasiy mabüsler olğanını bile. Bu insanlar iç bir vaqıt zorbalıq, terrorizm ya da aşırıcılıq areketlerine qoşulmağan ediler. Amma, buña baqmadan, olarnı çeşit cedvellerge ve terroristler cedvellerine kirseteler. Tek bu sebepten olar ve qorantaları taqip etile", — dedi advokat.
O şunı da qayd etti ki, belgisiz maşnalarnen kelgen "quvetçiler" özlerini tanıtmadılar, olarnıñ arasında işğalli yerli cinaiy tahqiqatnıñ "mayorı" bar edi.
Hatırlatamız ki, Boğaçovanıñ aqayı Vadım Siruk, Başqırtistan Cumhuriyetiniñ Salavat şeerindeki 2-nci tüzetüv müstemlekesinde ceza çeke. "Hizb ut-Tahrir" davasınıñ Yalta gruppasınıñ qabaatlanğan iştirakçisi 12 yılğa üküm etildi.
Rusiye teşviqatçısı Aleksandr Fedorçak ve daa üç Rusiye arbiy adamınıñ mezarlıqları saban ayınıñ 31-nde işğal etilgen Qırımdaki Nijnöğirsk köyünde yandırılğan edi.
Saban ayınıñ 24-nde "İzvestiya" Rusiye neşiri öz "qaramanı" elâk olğanı aqqında haber etti. İlk neşirde Fedorçak Kupyansk yönelişinde çalışqanı yazılğan edi. Daa soñra, işğal etilgen Luğansk vilâyetinde top ateşinde elâk olğanını bildirdi. Ukrayina tarafı bu haberlerni izaatlamadı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
