Minusinsk şeer mahkemesi, Krasnoyarsk ülkesinden Rusiye Federatsiyasınıñ Federal mahkeme hadimleri hızmetiniñ müessiselerinden biriniñ Qırım siyasiy mabüsi, I gruppa saqatı Oleksandr Sizikovnıñ azat etilmesi aqqında muracaatını baqacaq.
Kreml mabüsiniñ anası Olena Sizikova bunı bildirdi, "Qırım birdemligi" cemaat teşkilâtınıñ advokatı da bunı tasdıqladı.
Sizikovnıñ imayeciniñ qayd etkenine köre, dava arizasınıñ arizacısı kör siyasiy mabüs tutulğan Minusinsk apishanesi ola bilir. Birinci toplaşuvnıñ künü soñra belli olacaq.
Onıñ anası qayd etti ki, Krasnoyarsknıñ 1-nci verem hastahanesinde teşkerüvden 15 kün keçken soñ, Sizikovnı apishanege keri yolladılar. Aman-aman bir ay devamında, saban ayınıñ 27-nden berli, onı Minusinskte tutalar.
Erkekniñ tam teşkerüvleri yapıldı, Rusiye ekimleri onıñ kör olğanını tasdıqladılar. 2009 senesi yol qazasından soñ oña I gruppa saqatlığı berildi.
Advokatnıñ aytqanına köre, hastahane Sizikovnı azatlıqqa çıqarmağa tevsiye etti, çünki körlük hastalığı apishanede bulunmağa imkân bermey.
Aynı zamanda oña 3-nci basamaq gipertonik diagnozı qoyuldı. Olena Sizikova añlattı ki, yüksek qan basımı sebebinden o, daima ap alıp, muntazam sürette hastahanede ve şifahanede reabilitatsiyadan keçmeli. Onıñ oğluna da damar içi tedavi yapmaq kerek.
Bundan da ğayrı, anasınıñ qayd etkenine köre, qırımtatarnıñ tiş meseleleri başlandı. Ekimler ağrı sebebinden tişlerini çıqarmağa tevsiye ettiler, amma o, bunı red etti ve olarnı tedaviylemege istedi.
"Hizb ut-Tahrir davası"nıñ dörtünci Bağçasaray gruppası aqqında ne bilemiz
2020 senesi oraq ayınıñ 7-nde Qırımda keçirilgen kütleviy tintüvler vaqtında yedi kişi tutuldı. Aqmescitniñ "Kıyiv rayon makemesi" altı mabüs içün tevqif tedbirini sayladı.
İsmet İbrahimov, Zekirya Muratov, Vadim Bektemirov, Emil Ziyadinov, Alim Sufyanov, Seyran Hayredinov "makeme" zalında apiske alındı ve Aqmescitteki taqiqat izolâtorına yerleştirildi. Birinci gruppa körme saqatlığına saip olğan Oleksandr Sizikov ev apsine alındı.
Tutulğanlarnıñ episi, Rusiyede terroristik olaraq tanınğan, amma dünyanıñ çoq ülkesiniñ milliy seviyesinde sıñırsız faaliyet etken "Hizb ut-Tahrir" islâm siyasiy firqasında iştirak etkeninde qabaatlanalar.
2023 senesi qara ayında "devlet prokurorı" "Hizb ut-Tahrir" davası çerçivesinde Cenübiy bölge arbiy makemesinde Oleksandr Sizikov içün 18 sene rica etti.
2023 senesi mayısnıñ 17-nde Rusiye Federatsiyasınıñ Cenübiy bölge arbiy makemesinde Oleksandr Sizikovnı 17 senege azatlıqtan marum etüv cezasına maküm ettiler. Alim Sufyanov ve Seyran Hayderinov 12 sene sert rejimli müstemlekege üküm etildi. Birinci dört senesini olar da apishanede keçirecekler.
Rusiye makemesi Sizikovnı sert rejimli apishanege yolladı ve apishaneden soñ daa bir buçuq senege azatlıqtan marum qaldırdı, oña cemaat tedbirleri ve toplaşuvlarğa barmamağa emir etti.
2024 senesi berim ayında Moskva vilâyetiniñ istinaf makemesi "Hizb ut-Tahrir davası"nıñ dörtünci Bağçasaray gruppasına qarşı şikâyet arizasını baqmağa devam etti. Onıñ iştirakçileri Alim Sufyanov, Seyran Hayredinov ve körme qabiliyetini coyğan saqatlı qırımtatar Oleksandr Sizikovdır. Olar tintüvler ve "makeme taqiqatı" vaqtında yapılğan bir sıra bozuvlarnı qayd ettiler.
Hizb ut-Tahrir, islâm siyasiy fırqasıdır. 2003 senesi Rusiyede o, terrorcı bir teşkilât olaraq tanındı, oña bağlı olğan insanlarnı ise taqip etmege başladılar. İştirakçileri, "qanunlarğa qarşı faaliyet"te ve böyle degen "cian hilâfeti"ni yaratmağa ıntılmağa qabaatlanalar. 2014 senesi Qırım işğal etilgen soñ işğalcilerniñ qanunları zapt etilgen Qırımda da qullanılmağa başlandı. Qırımlı musulmanlarnı da Hizb ut-Tahrirge bağlı olmaqta qabaatlamağa başladılar, böylece yarımadanıñ işğaline qarşı olğanı sebebinden qırımtatarlarğa basım arttı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
