Qanunsız olaraq 14 yılğa apiske alınğan qırımtatar uquq qorçalayıcısı Server Mustafayev eki ay devamında Tambov şeeriniñ 1-inci müstemlekeniñ kamera türlü odasına (KTO) yerleştirildi.
"Qırım birdemligi"ne onıñ apayı Mayye Mustafayeva bunı bildirdi.
Onıñ aytqanına köre, 2025 senesi saban ayınıñ 25-nde Server Mustafayevni başta üç künge ceza izolâtorına yolladılar. Çiçek ayınıñ 1-nde onı eki ayğa KTOa avuştırdılar. Ailesi, tutuluv şaraitiniñ kerginleşmesiniñ sebeplerini bilmey.
"Server çoq şey aytıp olamadı, tek teşkerüvcilerden biri — eyyet hadimi, dinimizge menfiy yanaşqanını, musulmanlarğa qarşı ögünen yanaşqanını bildirdi", — dep Mayye Mustafayeva tarif etti.
Server Mustafayev aqqında ne bilemiz
Server Mustafayev, "Qırım birdemligi" cemaat birleşmesiniñ idarecisidir. Qırım siyasiy mabüsleriniñ ailelerine uquqiy, malümat ve içtimaiy-yaşayış ceetinden yardım ete.
2014 senesinden başlap Mustafayev, Qırımdaki vaziyetni muntazam tarzda nezaret ete be siyasiy sebepli makeme ceryanlarını aydınlata edi.
2018 senesi mayıs ayınıñ 21-inde quvetçiler evlerini tintip, Server Mustafayev ve Edem Smayilovnı tuttılar.
2020 senesi berim ayınıñ 16-sında Rostov-na-Donudaki Cenübiy bölge arbiy makemesinde qırım musulmanını 14 senege maküm ettiler.
Saban ayınıñ 14-ünde Vlasisadaki Apellâtsiya arbiy makemesi, qorçalayıcı tarafnıñ şikâyetnamesini baqıp, qanaatlendirmedi. Umumen dava çerçivesinde 45 makeme oturışı keçirildi.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız