Qırım sakinlerini Ukraina tarafdarı olğanları ya da Rusiye arbiy tecavuzını tenqit etkenleri içün "aşırıcılıq" maddesine binaen cinaiy mesüliyetke çekeler. Bu qış böyle üç adise qayd etildi, ve saban ayına qadar daa eki adise aqqında belli oldı.
Saban ayınıñ 24-nde "Irade" cemaat teşkilâtı uquq qorçalayıcılarınıñ qapalı maruzasına atıfnen "Tribunal. Qırım epizodı" Telegramda böyle malümat derc etildi.
"Soñki beş apis cezası Rusiye ordusı tarafından başlatılğan cenkke qarşı ya da Ukrainağa açıq qol tutuvnen bağlı. Lâkin resmiy teşviqat menbalarında malümat "ruslarğa qarşı zorbalıq çağıruvları" içün tutulğanını bildire. Tabiiy ki, deşifr etilmegen, bu sebepten bu qavimge qarşı nefret bar", — dep aytıla haberde.
Teşkilâtnıñ analitikacılarınıñ qayd etkenlerine köre, soñki eki yıl içinde yarımadada yaşağan diger halqlarğa qarşı zorbalıqqa çağıruvlarnen bağlı cinaiy davalar qayd etilmedi.
"Bu kibi laflar em qırımtatarlarğa, em de, misal içün, azerbaycanlılarğa nisbeten teşviqat yayınlarında çoq qullanıla. Böyle saylanğan "aşırıcılıqnen küreş" sadıq olmağan ealini taqip etüv ve Ukraina tarafdarlarınıñ duyğularını bastırmaq şekillerinden biri kibi körüne", — dep uquq qorçalayıcılar qayd ettiler.
Bu areketler insaniyetlikke qarşı cinayet kibi körüne, dep teşkilât qoştı.
Hatırlatamız ki, "QırımSOS"nıñ malümatına köre, 2024 senesi işğalli Qırım makemeleri ve Rusiye Federatsiyasınıñ birinci instantsiya makemeleri eñ azından 66 insanğa qanunsız ükümni çıqardı, istinaf makemeleri 25 insannıñ davası, kassatsiya makemeleri ise 33 insannıñ davalarını baqtı. Davalar adaletli makeme aqqınıñ bozuluvınen devam ete edi.
