Qırımdaki obyektlerge yapılğan ukrain ücümleri işğalcilerni sıqıştırıp tura. Hususan, olar Keriç köprüniñ mudafaasını quvetleştireler.
"Yedıni novını" milliy telemarafonınıñ canlı yayınında Ukraina Arbiy deñiz quvetleriniñ matbuat kâtibi Dmıtro Pletentçuk bunı tarif etti.
Onıñ aytqanına köre, Keriç köprüne kirmezden evel diqqatlı teşkerüv keçirile. 2025 senesi qara qış ayında pasport nezareti kirsetildi.
"Ruslar mahsus hızmetlerimiz tarafından yapıla bilecek areketlerden qorqqanları içün, teşkerüv bayağı hucur. Bundan da ğayrı, bu mevsimden evel Qırımğa ketirilgen taşımalarnıñ artmasınen bağlıdır. Elbette, iç bir patlav rusiye turistini ukrain Qırımından qorquzıp olamay. Aynı şekilde bu sene de Anapa yalılarında mazut lekelerini keçeceklerini körmek mümkün olacaq", — dep Dmıtro Pletçençuk qayd etti.
Onıñ aytqanına köre, keçken künü Rusiye gemileri acele Novorossiysk limanını terk etti. Bu, ruslarnıñ öz noqtalarına ücüm etmekten qorqqanlarını köstere.
"19 gemi, kerçekten de, deñizge çıqtı. Rusiye flotunıñ Novorossiyskteki baza noqtası pek yahşı qorçalanğan olsa da, bu, duşmannıñ ücümlerden qorqqanını köstere. O yerde limanda teşkil etile bilgen er şey qullanıldı: suv üzeri ve suv altı vaziyetini ögrenüv vastaları, AM sisteması, nezaret noqtaları, anti-dron tedbirleri. Bu, kerçekten de, Qara deñiz flotunıñ Azaq-Qara deñiz bölgesindeki soñki forpost olğanını köz ögüne alsaq, imkânlarnıñ çoqusını anda topladılar", — dep Dmıtro Pletçençuk tarif etti.
Hatırlatamız ki, saban ayınıñ 19-nda Bİİ işğal etilgen Qırımda on üç qıymetli Rusiye radiolokatsiya stantsiyasınıñ yoq etilüvi aqqında bildirdi. Bundan ğayrı, AM sistemaları, deñiz gemileri ve vertolötları da zarar kördi.
Bundan evel Ukraina arbiy deñiz quvetleriniñ komandanı Oleksiy Neijpapa "The Guardian" neşirine bergen intervyusında ayttı ki, Ukraina Keriç köprüne üçünci kere ücüm ete bile. Bu sualni USQniñ deñiz quvetleri muzakere ete. Evelki eki patlav yol ve demiryol qurulışlarına zarar ketirdi.
Telegram, WhatsApp ve Facebookta Suspilne Qırım haberlerine abune oluñız