Rusiye arbiy taqiqat eyyeti, "Hizb ut-Tahrir davası"nıñ ekinci Canköy gruppasınıñ iştirakçileriniñ evleri tintilgende kitaplar qoyulğanına dair davanı açmadı. Qarar kiçik aynıñ 25-nde qabul etilgen edi, amma saban ayınıñ 11-nde Rusiyeniñ Rostov-na-Donu şeerindeki Cenübiy bölgeniñ arbiy makemesinde seslendirildi.
Saban ayınıñ 12-nde advokat Refat Yunus "Qırım birdemligi" cemaat teşkilâtına bunı bildirdi.
"Makemege muracaat etip, tintüvlerniñ neticelerini qabul etilmeycek delil olaraq tanımağa rica ettik. Müvekkillerimiz delillerniñ sahteleştirilüvi aqqında da şikâyet ettiler. Onıñ içün prokuror [2024 senesi boş ayda] imayeciniñ delillerini red etmek içün teşkerüv keçirmege qarar aldı", — dedi o.
Advokatnıñ aytqanına köre, teşkerüv eki ay devam etti. Onıñ neticesinde taqiqatçılar "cinayet vaqialarını belgilemege imkânları olmağanını" bildirdiler.
Aynı zamanda Rusiye makemesi, taraflarnıñ munaqaşalarğa azırlanıp, dava bozulğanını red etüvge munasebetini bildirmeleri içün oturışnı saban ayınıñ 24-ne qaldırdı.
"İmayeci taraf bugünki vaziyette bu makeme qararını tekrar şikâyet etmege niyetlene", — dep Yunus qayd etti.
Bundan evel advokat Lilâ Gemeci "Qırım birdemligi"ne bildirdi ki, dava mabüsleri tintüvler vaqtında evlerinde çetel şahıslarnı körmediler.
"Olarnı kim qoyğanını bilmeyler. Olar bunı körmediler, amma edebiyat endi tintüvde peyda olğanını israr ettiler", — dep advokat qayd etti.
"Hizb ut-Tahir" davasınıñ ekinci Canköy gruppası aqqında ne bilemiz
Qara qış ayınıñ 24-ünde Canköy rayonınıñ köylerinde insanlarnıñ evleri tintilgen soñ altı qırımtatar adamı tutuldı ve Aqmescitke ketirildi. Anda ertesi künü olar tevqif etildi ve 1. SİZOda qapatıldı.
Arman ayında olarnıñ cinaiy davasınıñ bilgileri Rostov-na-Donudaki Cenübiy bölge arbiy makeemsine yollandı. Olar, Rusiyede yasaqlanğan ve dünyanıñ ülkeleriniñ çoqusında serbest şekilde faal etken "Hizb ut-Tahrir" islâm fırqasında iştirak etmege qabaatlanalar.
Berim ayınıñ 13-ünde belli oldı ki, "dava"nıñ iştirakçileri Aqmescitteki taqiqat izolâtorından Rostov-na-Donudaki 1. SİZOğa etap etildi.
Telegram, WhatsApp ve Facebookta Suspilne Qırım haberlerine abune oluñız