65 yaşındaki qırımtatar siyasiy mabüsi Nasrulla Seydaliyev Krasnoyarsk vilâyetiniñ Minusinsk şeerindeki müstemlekede ağır alda buluna. Hronik hastalıqları sebebinden 21 kün Krasnoyarsk hastahanesinde yatıp, onı kerekli tedaviylevsiz müstemlekege qaytardılar.
Siyasiy mabüsniñ tuvğanları Qırımtatar maaliy merkezine bunı bildirdiler.
Olarnıñ aytqanlarına köre, mabüslerni temiz avada sıq-sıq çıqarmaylar, bu ise onıñ vaziyetini daa beter ete. Kerekli tibbiy yardım kösterilmegeni sebebinden onıñ hronik hastalıqları kerginleşti: yüksek qan basımı, ağır varikoz hastalığını çeke, ayaqları şişeler.
"Oña er kün belli olmağan ilâclar berile, o, ağır ağrıları ve başqa tedaviylev usulları olmağanı sebebinden olarnı almağa mecbur", — dep tuvğanları bildirdiler.
Müstemlekede o, daa eki qırımtatar siyasiy mabüsinen, şu cümleden, işğalciler tarafından Noman Çelebicihan batalyonı davası boyunca 3,5 yılğa üküm etilgen Lenur Halilovnen tanış oldı.
Soy-sopları ve uquq qorçalayıcılarnıñ qayd etkenlerine köre, 65 yaşındaki adamnıñ böyle şaraitte tutulması — kerçekten de işkence ve ayatı içün telükedir.
Hatırlatamız ki, Nasrulla Seydaliyev 2022 senesi saban ayınıñ 4-nde işğal etilgen Qırımda tutuldı. İşğalli makeme onı müstemlekede 9 yılğa üküm etti, bu ükümni anonim şaatlarnıñ ifadeleri ve Rusiye quvetçileriniñ kontrol etkenleri mütehassıslarnıñ hulâsaları esasında çıqardı.
Telegram, WhatsApp ve Facebookta Suspilne Qırım haberlerine abune oluñız