İşğal etilgen Qırımda 2024 senesi devamında eñ azından altı zorbalıqnen ğayıp oluv adisesi qayd etildi. Eki erkek ve dört qadın aqqında söz yürsetile.
"Qırım SOS" bu aqqında haber etti.
"Dört adisede FSB hadimleri tintüvlerden soñ fedalarnı belli olmağan yerge alıp kettiler, amma tuvğanlarına tutulğanlarnıñ uquqiy statusı ve yaşağan yeri aqqında haber etmege red ettiler", — dep "Qırım SOS" analitikacısı Yevheniy Yaroşenko qayd etti.
Soñki belli feda — yarımadanıñ Canköy rayonında yaşağan Lera Cemilova. 2024 senesi mayıs ayında işğalli quvetçiler tarafından 15 künge apiske alındı. Yaqınları, onıñ şimdi bulunğan yeri aqqında bilmey.
Teşkilâtnıñ bildirgenine köre, Qırımnıñ işğali devamında 67 adam hırsızlandı, 23 insan 2014 senesi saban ayında ğayıp oldı, dep "Qırım SOS" bildirdi.
"Çoqusı allarda olarnıñ episi qanunsız "referendum"ğa qarşı çıqqan Ukraina tarafdarı faalcilerdir. Olardan biri — saban ayınıñ 3-nde Simferopolda (AqmescitRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki adte — terciman) Rusiye işğaline qarşı bir kişilik narazılıq aktsiyasını keçirgen Reşat Ametov. Aynı şu künü onı "Qırım öz-özüni mudafaa etüvi" milliy arbiy birleşmesiniñ iştirakçileri hırsızladılar, bir qaç künden Reşatnıñ cesedi bir çoq azap izlerinen tapıldı. 2014 senesi saban ayınıñ 7-nde hırsızlanğan Valeriy Vaşçuk ve İvan Bondarets, em de aynı yılnıñ saban ayınıñ 15-nde ğayıp olğan Vasıl Çernışnıñ taqdiri alâ daa belli degil", — dep aytıla haberde.
"Qırım SOS" analitikacısı Yevheniy Yaroşenkonıñ aytqanına köre, 2014 senesi saban ayında yüz bergen zorbalıqnen ğayıp oluvlar Rusiye ya da onıñ nezaretindeki gruppalarnıñ Ukraina topraq bütünliginiñ tarafdarlarına qarşı terror siyaseti olğanını köstere.
Telegram, WhatsApp ve Facebookta Suspilne Qırım haberlerine abune oluñız