"Hizb ut-Tahrir davası"nıñ ekinci Aqmescit gruppasınıñ mabüsi, vatandaş jurnalisti Rustem Şeyhaliyev 14 yılğa üküm etilgen soñ, Krasnoyarsk vilâyetiniñ Yeniseysk apishanesinden 1-nci Vilâyetteki verem hastahanesiniñ tibbiy-terbiyev müessisesine yollanıldı.
Onıñ apayı Suriya Şeyhaliyeva kiçik aynıñ 14-nde Facebookta bunı bildirdi. O, aqayından "Zonatelekom" vastasınen mektüp aldı.
Onıñ aytqanına köre, Kreml mabüsiniñ sağlıq meseleleri ağır apis şaraitinden başladı. Hususan, onıñ qan damarlarınen meseleleri bar.
"Keçken sene çiçek ayında Novoçerkassk SİZOndan Yeniseysk apishanesine etap etilgen soñ, onıñ eki ayağında da varikoz bar edi. Hastalıq apishanede daa da tarqalğan edi. Amma tibbiy hadim "bir şey yoq" dep, teşkerüvge çağırdı, melem ve tabletkalarnı yazdırdı... Elbette, men bularnı yolladım, amma o, iç bir eyileşme körmedi", — dep siyasiy mabüsniñ apayı tarif etti.
2024 senesi berim ayında uzun bir körüşüvde Şeyhaliyeva, aqayınıñ ayaqları tizleri boyunça bozlaşqanını kördi. Şimdi, Rustemniñ aytqanına köre, ayaqları belden yuqarı köklendi, ağrı ve şişmege başladı.
"Soñunda ekimler onı hastahanege yollamağa qarar aldılar. Tedaviylenüv nasıl olacaq — ameliyat ya da damartı, iğneli; statsionarda ya da "evde" tedaviylev içün yollanılacaq — malümatım yoq", — dep qayd etti o.
Qadınnıñ aytqanına köre, aqayından mektüp alğan soñ, o, hastahanege telefon etti. Amma oña malümat bermege red ettiler.
"Qırımdan Krasnoyarskqa qadar 5,5 biñ kilometr barğanını añlatqan soñ, maña elektron poçtağa yazmağa teklif ettiler", — dep Suriya Şeyhaliyeva qoştı.
Hatırlatamız ki, evel apishaneniñ ekimleri siyasiy mabüs Rustem Şeyhaliyevni hastahanege ketirmege red ettiler. Bir kün evelsi, makeme oturışında apellâtsiya şikâyet arizasını baqıp, burnu qanıp başladı.
"Hizb ut-Tahrir davası"nıñ ekinci Aqmescit gruppası aqqında ne bilemiz
2019 senesi saban ayınıñ 27-sinde Qırımda qırımtatarlarnıñ evlerini kütleviy şekilde tinttiler. Aqmescit rayonınıñ Bavurçı, Mamaq, Yañı Abdal meskün yerlerinde taqiqat işleri yapıldı. İşğalciler, 20 qırımtatar adamını Hizb ut-Tahrir halqara siyasiy fırqasına ait olmakta qabaatlatıp tuttılar.
Rus mahsus hızmetleri daa üç insannı qıdırmağa ilân ettiler. 2019 senesi saban ayınıñ 28-inde Rusiyeniñ Rostov vilâyetiniñ Aqsay şeerinde daa üç qırımtatar adamını tutqanını bildirdiler. Tutulğan adamlar arasında "Qırım birdemligi"niñ içtimaiy jurnlisti Osman Arifmemetov da bar edi.
Aynı kün işğal etilgen Aqmescitteki Kıyiv rayon makemesi, tutulğan adamlarnı tevqif etip maküm etti.
2019 senesi yaz mevsiminde "Hizb ut-Tahrir davası"nıñ bu gruppasında tutulğan insanlarnıñ sayısı 25ke arttı. Tutulğanlar arasında "Qırım birdemligi" içtimaiy uquq qorçalayıcı areketiniñ faalcileri çoq edi. Olar, Qırımda siyasiy sebepli taqipler fedalarını qorçalamağa yönelten faal işinen bellilerdi. Olar arasında uquq qorçalayıcılar, içtimaiy jurnalistler ve gönüllüler bar.
Çoq bilgi olğanı sebebinden işğalciler 25 iştirakçinen cinaiy davanı beşer gruppağa böldiler.
2022 senesi boş aynıñ 24-ünde Rostov-na-Donudaki Cenübiy bölge arbiy makemesi, davanıñ iştirakçilerini terror faaliyetinde ve akimiyet zapt etmekte qabaatlı tanıdı. Enver Ametov ve Yaşar Müedinov 13 senege, içtimaiy jurnalistler Roslan Süleymanov, Rustem Şeyhaliyev ve Osman Arifmemetov 14 senege maküm etildi. Siyasiy mabüsler dört sene apishanede geçirecek soñ bir sene areket sıñırlanmaları astında olacaqlar. Qabaatlanğan adamlar öz qabaatını tanımadılar ve taqip etilgenlerini siyasiy olğanını tüşüneler.
Hizb ut-Tahrir, islâm siyasiy fırqasıdır. 2003 senesi Rusiyede o, terrorcı bir teşkilât olaraq tanındı, oña bağlı olğan insanlarnı ise taqip etmege başladılar. İştirakçileri, "qanunlarğa qarşı faaliyet"te ve böyle degen "cian hilâfeti"ni yaratmağa ıntılmağa qabaatlanalar. 2014 senesi Qırım işğal etilgen soñ işğalcilerniñ qanunları zapt etilgen Qırımda da qullanılmağa başlandı. Qırımlı musulmanlarnı da Hizb ut-Tahrirge bağlı olmaqta qabaatlamağa başladılar, böylece yarımadanıñ işğaline qarşı olğanı sebebinden qırımtatarlarğa basım arttı.
Telegram, WhatsApp ve Facebookta Suspilne Qırım haberlerine abune oluñız