"Hizb ut-Tahrir davası"nıñ birinci Bağçasaray gruppasınıñ mabüsleri Rustem Abıltarov, Zevri Abseitov ve Remzi Memetov, kiçik aynıñ 11-nde 9 yıl devamında Rusiye müstemlekelerinden qanunsız apis etilgen soñ azat etildi.
Rusiye müstemlekesinden azat etilgen soñ sürgün etilgenlerniñ ilk teessuratları Suspilne Qırımnen paylaşa.
"Şimdi olğan duyğularımnı söznen ifade etmek mümkün degil. Bütün bu vaqıt devamında maña qol tutqan tuvğan halqıma minnetdarlığımnı bildirmege isteyim — areketlernen, sözlernen. Asılında, bu halqımnıñ qaramanlığıdır. Sağlığı baqımından o, aman-aman normal. Elbette, anda keçirgen yıllarım izsiz keçmedi — em maneviy, em de bedeniy ceetten bu tesir etti", — dep azat etilgen soñ Remzi Memetov ayttı.
O, planları olmağanına qadar çalışıp, tuvğanlarına yardım etecek, dep qoştı.
"Etrafda serbestlik bar, er kes öz işini yapa, kimisi işke bara, kimi qorantasınen kete. Bir taraftan, serbestlik duyğusı bar. Diger taraftan, menim içün biraz acayip", — dedi o.
Zevri Abseitov azat etilgen soñ ilk duyğularını paylaştı.
"Evelden 9 yıl keçti, soñra azatlıqqa çıqtıq. Vaqıt pek yavaş keçti, amma, Yüce Allahnıñ yardımı ile, er şeyni yeñdik", — dep siyasiy mabüs tarif etti.
O, oña ve başqa mabüslerge qoltutqan er keske, hususan Rusiye makemelerinde qırımtatarlarğa yardım etmege devam etken advokatlarğa teşekkürler bildirdi.
Rustem Abıltarov qayd etti ki, azat etilgen künü onıñ içün kerçek bir duyğu sınavı oldı.
Soñra, çoq beklengen künimiz keldi. Duygularıñ tarifsiz, ne aytacağını bile bilmeysiñ, bu duyğularnı nasıl ifade etecegini bile bilmeysiñ. Bütün bu yıllar devamında yanımızda olğan advokatlarımızğa minnetdarlığımnı bildirmege isteyim", — dedi Abiltarov
"Hizb ut-Tahrir davası"nıñ birinci Bağçasaray gruppası aqqında ne bilemiz
2016 senesi mayısnıñ 12-nde işğal etilgen Qırımnıñ Bağçasaray şeerinde tintüvler neticesinde dört qırımtatar tutuldı. Aşçı Remzi Memetov, iş adamı Enver Mamutov, tiş ekimi Zevri Abseitov ve terciman Rustem Abiltarov Rusiye Cinayet qanunnamesiniñ 205.5-nci "terror teşkilâtınıñ faaliyetinde iştirak etüv" maddesine binaen qabaatlandı.
2018 senesi ilk qış ayınıñ 24-nde Cenübiy bölgeniñ arbiy makemesi Remzi Memetov, Rustem Abiltarov ve Zevri Abseitovnı 9 senege üküm etti. Enver Mamutovğa 17 yıl apis cezası berildi. 2019 senesi oraq ayınıñ 11-nde Rusiye Yuqarı makemesi ükümni yımşatıp, dörtüniñ apis cezasını üç ayğa qısqarttı.
2019 senesi oraq ayınıñ 18-nde Avropa parlamenti Rusiyeni bütün ukrain siyasiy mabüslerini, şu cümleden bu cinaiy davanıñ mabüslerini azat etmege çağıruvnen rezolütsiya qabul etti.
Hizb ut-Tahrir, islâm siyasiy fırqasıdır. 2003 senesi Rusiyede o, terrorcı bir teşkilât olaraq tanındı, oña bağlı olğan insanlarnı ise taqip etmege başladılar. İştirakçileri, "qanunlarğa qarşı faaliyet"te ve böyle degen "cian hilâfeti"ni yaratmağa ıntılmağa qabaatlanalar. 2014 senesi Qırım işğal etilgen soñ işğalcilerniñ qanunları zapt etilgen Qırımda da qullanılmağa başlandı. Qırımlı musulmanlarnı da Hizb ut-Tahrirge bağlı olmaqta qabaatlamağa başladılar, böylece yarımadanıñ işğaline qarşı olğanı sebebinden qırımtatarlarğa basım arttı.
Telegram, WhatsApp ve Facebookta Suspilne Qırım haberlerine abune oluñız