Qırımdaki Feodosiya (KefeRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad) şeeriniñ işğalli makemesi yerli sakinni "haber-telekommunikatsiya ağları, hususan "İnternet" ağları vastasınen yapılğan aşırıcı faaliyetke açıq çağıruvlar" sebebinden müstemlekede 2,6 yılğa üküm etti (Rusiye Cinayet qanunnamesiniñ 280-nci maddesiniñ 2-nci qısmı). İşğalli taqiqatnıñ malümatına köre, adam Telegramda Rusiyege qarşı yazılar altında izaatlar bere edi.
İşğal etilgen Kefe şeer makemesiniñ matbuat hızmeti Ukrainada yasaq etilgen "VKontakte" içtimaiy ağında bu aqqında haber etti.
Bundan ğayrı, "makeme" 37 yaşındaki adamğa 2,6 yıl devamında elektron ya da haber-telekommunikatsiya ağlarınıñ saytlarını idare etmekten yasaq etti.
"Taqiqat"nıñ malümatına köre, 2022 senesi berim ayınıñ 13-nden 2024 senesi oraq ayınıñ 8-ne qadar yerli sakin Telegramda Rusiyege qarşı yazılar altında "Ukraina vatandaşları ve başqa memleketlerniñ vatandaşlarına qarşı milliy nefret sebebinden añlayışlı olaraq aşırıcı faaliyetke çağıruvlar" yazğan edi.
Telegram, WhatsApp ve Facebookta Suspilne Qırım haberlerine abune oluñız