Ukraina prezidenti Volodımır Zelenskıy Qırımdaki yañı daimiy temsilcisini tayin etti. O, Olğa Mıkolayivna Kurışko oldı.
Prezidentniñ saytında böyle emir yayınlandı.
"Kurışko Olğa Mıkolayivnanı Ukraina prezidentiniñ Qırım Muhtar Cumhuriyetindeki daimiy temsilcisi olaraq tayin etmek", — dep aytıla emirde.
Qayd etilmeli ki, Olğa Kurışko Temsilcilik taqımına 2021 senesi ilk qış ayında qoşuldı. O, Qırımnıñ reintegratsiyasına dair strategik vesiqalarnıñ azırlanılmasında iştirak etti, em de işğal etilgen yarımada sakinleriniñ aqlarını qorçalağan uquqiy-normativ aktlar üzerinde çalıştı.
"Yañı vazifesinde Olğa Kurışko, Temsilcilikniñ taqımınen beraber, endi başlatılğan teşebbüslerni amelge keçirmege devam etecek ve Qırımnı işğalden azat etüv, onıñ sakinleriniñ, Ukrainanıñ tamır halqlarınıñ aqlarını qoruv ve reintegratsiya esnaslarını desteklev vazifesinde organnı quvetleştirmek içün çalışacaq", — dep Temsilcilik bildirdi.
Telegram, WhatsApp ve Facebookta Suspilne Qırım haberlerine abune oluñız