Rusiye işğalcileri tarafından sert rejimli müstemlekede 8,5 senege üküm etilgen qırımtatar siyasiy mabüsi Rustem Gugurık sol qulağında eşitme qabiliyetini coydı. Bundan da ğayrı, kerekli tedaviylev olmağanı içün adamnıñ nefes alması zor ola.
Qırımtatar Maaliy Merkezi (QMM) bunı bildirdi.
Qayd etildi ki, siyasiy mabüsniñ sol qulağı eşitmey ve o tedaviylenmegeni içün nefes aluvı qıyın olğanını ayta — müstemlekede oña tek qan şingenlendirici ilâc berile.
Şimdiki vaqıtta adamnı 70 kişilik umumiy kamerada tutalar, anda çoqusı esli-başlı insanlar buluna. Bundan da ğayrı, anda o, keyfiyetsiz aş ala.
"Onı "köpekler içün aşnen" bile qıyaslay. Rustem Gugurık endi eki yıldır esirlikte buluna. Kerekli tibbiy yardım kösterilmegeni içün sağlığı pek fenalaşa. Ailesinen siyasiy mabüs telefon vastasınen bağ tuta, amma parsellerni yalıñız yarım yılda bir kere ala bile. O, yalıñız ailesinden alğan paranen müstemleke tükânında satın alğan şeylerinen aşay. Lâkin aşayt mallarını parseller vastasınen yollamağa yasaq etile", — dep QMM añlattı.
Rustem Gugurık aqqında ne bilemiz
2022 senesi saban ayınıñ 27-nde FSB hadimleri onı Herson vilâyetiniñ Qırımnen memuriy sıñırında Çonğarda tuttılar.
Barışıq vaqtında çoq balalı qırımtatar adamı taksici olaraq çalışqan edi. O, insanlarnı Çongarğa alıp ketken edi. O künü, Rusiye istilâsı sebebinden, adam qorantasını Bağçasarayda tuvğanlarına alıp ketmege tırışa edi.
2016 senesi Rustem ve qardaşı Bekir Gugurık 2021 senesine qadar işğal etilgen Qırımğa kiriş yasağı aqqında haber aldılar.
Saban ayınıñ 31-nde belli oldı ki, Rusiye kontrolindeki Aqmescitniñ Kıyiv rayon makemesi Rustem Gugurıknı "Noman Çelebicihan adına göñülli batalyonda" iştirak etkeninden şübeli sayılıp, eki ayğa apiske aldı.
2022 senesi orta küz ayında Aqmescitniñ işğalli Kıyiv rayon makemesi Gugurıknı "Noman Çelebicihan adına batalyon"da iştirak etkeni içün müstemlekede 8,5 yılğa üküm etti.
Rusiye Ceza qanunnamesiniñ 208-inci maddesiniñ 2-nci qısmına binaen ("federal qanunğa uymağan silâlı birleşmede iştirak etüv") Aqmescitniñ Kıyiv rayon makemesiniñ "makemecisi" Olga Kuznetsova üküm çıqardı.
Telegram, WhatsApp ve Facebookta Suspilne Qırım haberlerine abune oluñız