"Hizb ut-Tahrir davası"nıñ ekinci Bağçasaray gruppasınıñ qanunsız apis etilgen mabüsi Edem Smailovnı başqa müstemlekege etap ettiler. Qırım siyasiy mabüsiniñ apis cezaları da sertleştirildi.
"Qırım birdemligi", siyasiy mabüsniñ apayı Lilâ Smailovağa esaslanıp, bunı bildirdi.
Onıñ aytqanına köre, Smailovnı Kostroma vilâyetindeki 7-nci apishaneniñ ğayrıdan qurulğanı sebebinden, ondan Kostromdaki 1-nci tüzetüv müstenlekesine etap ettiler.
"Onıñ müstemlekede vaziyetini ögrenmege imkânım olğanına pek quvandım, çünki aman-aman eki aydır ondan iç bir haber yoq edi", — dep Lilâ Smailova tarif etti.
Qadın, 2024 senesi ilk qış ayınıñ 13-nde 1-nci müstemlekeniñ yolbaşçısından Edem Smailovnıñ başqa müstemlekege etapı aqqında ögrendi.
Smailovnıñ 7-nci müstemlekede tayin etilgen "ceza müddeti rejimini qaba bozulğanı" sebebinden mabüsni birden PKPkamera türlü oda odasına yerleştirdiler.
Advokat Nazim Şeyhmambetovnıñ aytqanına köre, ceza "iftiracı sebeplerden" tayin etildi. Edem Smailov geceleri ayaqyolğa barğanı, yuvunğanı ve namaz qılğanı içün mümkün olğan 15 künlik apis cezasından 14 künlik apis cezası berildi. Qara qış ayınıñ 17-nde Qırımnıñ Bağçasaray bölgesi makemesi ceza qanunsız olğanını tanımağa red etti.
Hatırlatamız ki, Edem Smailov 2018 senesi mayıs ayında tevqif etildi. 2020 senesi berim ayınıñ 16-nda Rostov-na-Donudaki Cenübiy bölgeniñ arbiy makemesi onı "Hizb ut-Tahrir" teşkilâtınıñ faaliyetinde iştirak etkeni içün 13 senege üküm etti. Smailov apiske alınğanına qadar "Topçıköy" din cemiyetiniñ reisi edi ve cemaat faaliyetinen oğraşa edi — diniy bayramlarnı teşkil ete ve olarda iştirak ete edi.
"Hizb ut-Tahrir davası"nıñ ekinci Bağçasaray gruppası aqqında ne bilemiz
2017 senesi orta küz ayınıñ 11-nde Rusiye FSB işğal etilgen Bağçasarayda altı qırımtatarnı tuttı: Timur İbragimov, Marlen (Süleyman) Asanov, Memet Belâlov, Seyran Saliyev, Server Zekiryayev ve Ernes Ametov.
Bir seneden soñ, 2018 senesi mayısnıñ 21-nde, işğalciler Edem Smailov ve Server Mustafayevni evlerinde tutıp aldılar.
Olarnı Rusiyede yasaqlanğan, amma Ukraina ve dünyanıñ ülkeleriniñ çoqusında serbest faaliyet köstergen Hizb ut-Tahrir islâm siyasiy firqasınıñ faaliyetinde qabaatlaylar.
Tutulğanlarnıñ episi işğalli Kıyiv rayon mhkemesiniñ qararındn apiske alındı ve tahminen üç sene taqiqat izolâtorında tutuldı.
2022 senesi berim ayınıñ 16-nda Rostov-na-Donudaki Cenübiy bölge arbiy makemesinde bu dava üzerinde üküm çıqarıldı. Onıñ qabaatlıları 13-19 sene apis cezasına maküm etildi.
022 senesi saban ayınıñ 14-nde Vlasiha şeerindeki Apellâtsiya arbiy makemesi imayeciniñ şikâyetlerini aman-aman bütünley red etti ve mabüslerniñ apis müddetlerini aman-aman deñiştirmedi. Seyran Saliyevniñ apis cezası bir senege qısqartıldı - 15 senelik müstemleke cezasına, Ernes Ametovnıñ apis cezası lâğu etildi.
Avropa parlamenti öz rezolütsiyasında Rusiye Federatsiyasını bütün ukrain siyasiy mabüslerini, şu cümleden "Hizb ut-Tahrir davası"nıñ ekinci Bağçasaray gruppasınıñ mabüslerini azat etmege çağırdı.
"Memorial" uquq qorçalayıcı merkezi olarnı siyasiy mabüsler olaraq tanıdı ve Rusiyeni olarnı acelen azat etmege çağırdı.
Telegram, WhatsApp ve Facebookta Suspilne Qırım haberlerine abune oluñız