Ukraina etraftaki müit naziri Svitlana Ğrınçuk bildirdi ki, ilk qış ayınıñ 15-nde Keriç boğazında eki Rusiye "Volganeft" tankeriniñ qazası neticesinde işğal etilgen Qırımnıñ cenübiy yalısında mazuttan zarar körgen ve elâk olğan quşlar qayd etile. Qara deñiz bölgesiniñ bütün memleketleri de bu kibi deñiz kirlenüvi sebebinden qasevet çekeler.
O, qara qış ayınıñ 2-nde "Suspilne. Studiya"nıñ canlı yayınında bu aqqında haber berdi.
Nazirlikniñ malümatına köre, zarar körgen quşlar, hususan Köktebel, Aluşta, Gurzuf şeerleri yanında qayd etildi. Em de quşlarnıñ ölümi ve mazutnıñ yalığa kelgeni aqqında haberler bar. Etraftaki müit nazirligi vaziyetni nezaret etmege devam ete.
"Bulğaristan, Romaniya zenaatdaşlarımıznen er afta monitoring ve iş körüşüvlerini keçiremiz. Nazirlernen ayrı körüşüv olıp keçti, çünki tek Ukraina degil, bütün Qara deñiz bölgesiniñ memleketleri de bu vaziyetten raatsızlanalar. Hususan, bu endi birinci kere degil. 2011 senesi de aynı vaziyetke rastkelgen edik. Bu sefer deñizge ketken mazutnıñ miqdarı daa büyük edi. Bu sebepten biz nezaret etmege devam etecekmiz", - dep qayd etti Ğrınçuk.
Etraftaki müit nazirligi qayd etti ki, Rusiye ekologik meselelerni, etraftaki müitniñ qoruv meselelerini, halqara qaidelerni körmemezlikke ura ve bu "etraftaki müit içün fevqulâde aqibetlerge ketire".
Onıñ aytqanına köre, Rusiye Ukrainağa istilâsını başlağan soñ 3 trillion ğrıvnâ miqdarında ekologik zarar oldı. Bundan ğayrı, nazirlik 7100-den çoq etraftaki müitke qarşı cinayetlerni qayd etti. Şu cümleden, topraq kirletilmesi, mina qoyulması, qoruqlarnıñ bozulması ve yoq etilmesi, ava kirletilmesi.
Hatırlatamız ki, Rusiye bildirdi ki, ilk qış ayınıñ 15-nde Keriç boğazında batqan "Volganeft-212" ve "Volganeft-239" tankerleriniñ parçalarını teşkermege bitirdi. Bu iş 17 künde yapıldı.
İlk qış ayınıñ 30-nda Ukraina etraftaki müit qoruvı ve tabiat resursları nazirligi Qara deñizdeki yermay lekesi qara qış ayınıñ 3-ne qadar kenişleycegini bildirdi.
Rusiye akimiyeti Qara deñizde "Volganeft" tankerleriniñ qazası neticesinde peyda olğan mazutnen kirlenüvniñ 1%-den azını yoq etti, dep "Açıq dünya" Rusiye ekologik leyhası bildirdi.
Keriç boğazındaki qaza aqqında ne bilemiz
İlk qış aynıñ 15-nde Keriç boğazı yanında "Vologneft 212" ve "Vologneft 239" eki rusiye gemisi batmağa başlağan. Bir geminiñ kenarında ekipajnıñ 13 azası bulunğan edi, başqasınıñ kenarında ise – 14.
Evelden, vaqia sebebi furtuna ya da yaramay avası içün tankerlerniñ bozuluvı olğan. İlk qış aynıñ 15-ine qadar işğal etilgen Qırımda şiddetli yel sebebinden furtuna ihtarını bildirdiler.
Qaza neticesinde ekipajnıñ bir azası elâk olğan. Başqaları artqaç suvumasınen hastahanege yatqızdırılğanlar.
Eki rusiye tankeriniñ qazası, mazutnıñ 4 biñden ziyade tonnasınıñ tokülüvine alıp ketirgen. Greenpeace iddia etkeni kibi, o, ekologiya içün ciddiy aqibetlerini peyda ettirebile.
Qaradeñiz strategik tedqiqatlar institutınıñ reberi Andriy Klımenko qayd etkeni kibi, gemiler deñizge çıqmağa azır degiller, çünki özen soylarından, em de eski olalar – 1951 ve 1955 çıqış yılları.
Ukraina Arbiy-deñiz quvetleriniñ spikeri Dmıtro Pletentçuk bildirdi ki, bu eki tanker, kerçekten arbiy sınıf gemileri, deñizge gemilerniñ areket qaidelerine riayet etmeden çıqtı.
İlk qış ayınıñ 16-nda Rusiye Fevqulâde vaziyetler nazirligi "Volgoneft 239" tankeriniñ erkânı tahliye etilgenini bildirdi.
Etraftaki müit nazirligi, ilk qış ayınıñ 15-nde "Volgoneft-212" ve "Volgoneft-239" Rusiye tankerleriniñ qazası neticesinde çıqqan mazutnıñ Qara deñiz ekosisteması içün "felâketli aqibetleri" ola bilecegini bildirdi.
"Yeşil mektüp" cemaat teşkilâtınıñ yolbaşçısı, biolog Vladıslav Balinskıy Suspilne Qırımğa izaat bergende bu qazanı "asırnıñ eñ büyük ekologik felâketi" dep adlandırdı.
İlk qış ayınıñ 17-nde Qara deñizdeki Kavkaz limanı rayonında "Volgoneft-109" tankeriniñ kapitanı yük tanklarından biriniñ sızıqsızlığı sebebinden felâket signalını berdi. Bu endi üçünci kere "Volgoneft" tankerleriniñ mazut taşımasıdır.
İlk qış ayınıñ 19-nda ekipaj azasınıñ ölümine ketirgen "Volgoneft-212" tankeriniñ kapitanı eki ayğa - kiçik aynıñ 17-ne qadar apiske alındı. "Volgoneft-239" gemisiniñ kapitanı ise ev apsinde tutıldı.
İlk qış ayınıñ 20-nde Greenpeace, Anapadan Qırım köprüne qadar 65 km2 suv, batqan "Volgoneft" tankerlerinden birisinden aqqan mazutnen kirlengenini bildirdi. Etraftaki müit qorçalayıcıları felâketniñ miqyası daa büyük ola bilecegini tenbileyler.
İlk qış ayınıñ 20-nde Keriç boğazında Gvineya-Bisaunıñ gemisi astında yaldap ketken "Gam Express" felâket signalını berip, yardım içün muracaat etti.
İlk qış ayınıñ 21-nde Keriçniñ işğalli akimiyeti şeer plâjlarında mazut tapılğanı içün belediye fevqulâde vaziyetini ilân etti.
Telegram, WhatsApp ve Facebookta Suspilne Qırım haberlerine abune oluñız