Ukrainanıñ birinci hanımı Olena Zelenska "Fahriy elçi — 2024. Ğalebe iradesi" mukâfatını Qırımtatar Milliy Meclisiniñ reisiniñ birinci muavini Nariman Celâlğa berdi.
Olena Zelenska öz Instagram saifesinde bunı yazdı.
Onıñ aytqanına köre, Nariman Celâl atta Rusiye esirliginde qırımtatar halqınıñ zulumına şaatlıq etmege devam etti.
"İhtisasiy jurnalist, o, Rusiye mahsus hızmetleriniñ devamlı qorquzuvlarına baqmadan, işğal etilgen Qırımda Meclis reberliginden qalğan tek kişidir. Ve atta Rusiye esirliginde qırımtatar halqınıñ zulumı aqqında şaatlıq etmege devam etti", — dep qayd etti Zelenska.
O şunı da qoştı ki, çeşit memleketlerde Ukraina ve Qırımnıñ ihtisasiy ögrenilmesi içün şarait yaratılmalı.
"Böyle dayanıqlıqnı taqdirlemek içün mukâfat az. Şunıñ içün bizim borcumız — ukrain studiyalarından ğayrı, dünyada qırımtatar studiyaları peyda olsun, olar Nariman efendiniñ işini devam ettirsin ve işğal etilgen Qırım aqqında aqiqatnı dünyağa yetkizsin dep bu sene biz Global Koalitsiyanı teşkil ettik. Farqlı memleketlerde Ukraina ve Qırımnıñ ihtisasiy ögrenüvi — bu da bir çeşit diplomatiyadır, çünki o, imperiya saçmalığı ve sahteliklerden boş olğan bizler aqqında kerçek malümatnı taşıy", — dep qayd etti Zelenska.
O şunı da qoştı ki, mukâfat berilgende, Celâlnıñ izninen, apishaneden apayına yazğan mektüplerinden birini oqudı.
"Bazı vaqıtları tek ümütnen sevemiz. Ve soñunda, bizde olğan tek şey — sevgi ve oña bağlı olğan borclar". Sevginen yapılğan er şey ğalebe qazana. Çünki o, eñ küçlü elçidir", — dep qayd etti Birinci hanım.
Hatırlatamız ki, Suspilne Qırım azat etilgen qırım mabüsleri Leniye Umerova ve Nariman Celâlnen körüşüv teşkil etti. Açıq subet vaqtında olar Rusiye esirliginden azat etilüv, Qırım ve qırımtatar halqı aqqında laf ettiler.
Telegram, WhatsApp ve Facebookta Suspilne Qırım haberlerine abune oluñız