BMniñ Baş Assambleyası ilk qış ayınıñ 17-nde "Vaqtınca işğal etilgen Qırım MC ve Aqyar (Sevastopol) şeerinde insan aqları vaziyeti" rezolütsiyasını qabul etti. Ukraina Yuqarı Şurasınıñ insan aqları vekâletlisi Dmıtro Lubinets, bu Ukrainada barışıqqa irişmek içün nevbetteki adım olur, dep ümüt ete.
O, ilk qış ayınıñ 17-nde resmiy Telegram kanalında bunı bildirdi.
"Bu qarar içün sağ oluñız! Dünya bizge qol tutqanını duymaq müimdir. Ümüt etem ki, bu, adaletniñ tiklenmesi ve Ukrainada barışıqnıñ olması içün daa bir adım olur", — dep qayd etti ombudsman.
Aynı zamanda Ukraina tış işleri nazirligi, bu vesiqa BMniñ Baş Assambleyasınıñ Rusiye Federatsiyasınıñ Ukrainağa qarşı tecavuzını "Rusiye Federatsiyasınıñ Ukrainağa qarşı zapt etici cenki" (asılında — "War of aggression against Ukraine") dep adlandırğan BMniñ ilk qararı olğanını bildirdi.
"Vesiqanıñ qabul etilmesi halqara toplulıqnıñ Rusiye işğalcileriniñ cinayetlerini birdemliknen takbih etkenini ve er bir zorbalıq ve insan aqlarınıñ bozuluvı kerekli qıymet kesilecegini ve cezalanacağını köstere", — dep qayd etti müessise.
TİN qayd etti ki, BMniñ Baş Assambleyasınıñ ve Teşkilâtnıñ aza memleketleriniñ açıq-aydın nazar noqtası — halqara uquqqa ürmetni ğayrıdan tiklemek ve Rusiye Federatsiyasını bütün cinayetleri içün mesüliyetke çekmek içün müim bir adımdır.
Hatırlatamız ki, BMniñ Baş Assambleyasınıñ mütenasip rezolütsiyası, hususan, Rusiye akimiyeti tarafından Ukrainanıñ işğal etilgen topraqlarında, şu cümleden Qırımda qayd etilgen insan aqları ve esas serbestlikleriniñ muntazam bozulmasını takbih ete. Böylece, qırımtatarlarğa qarşı basqı, ukrain tarafdarı olğan faalciler, jurnalistler ve diniy azlıqlarnıñ vekillerine qarşı taqipler aqqında söz yürsetile.
Telegram, WhatsApp ve Facebookta Suspilne Qırım haberlerine abune oluñız