"Komandor" lağabınen belli olğan İrına Ğolosna Sevastopolda (Aqyarda) aphaneniñ müdiriyetinden Desant-ücüm ordusında dronlarnıñ operatorına qadar yol keçti.
Cenk başlağanda o, işğal etilgen Qırımnı terk etip, Ukrainanı qorçalamağa başladı. O, öz ikâyesini - motivatsiyası, küreşi ve evge qaytmaq arzusını tarif etti.
İrına Ğolosna, Aqyar aphanesiniñ sabıq müdiri, şimdi Ukrainanı qorçalay. Onıñ bölügi yaqında Rusiye, İrınanıñ aytqanına köre, "öz topraqlarını yoq etken" Kursk vilâyetinde cenk vazifelerini becerdi.
"Olar evlerini yıqalar, toprağını yoq eteler. Bunı ne qadar çoq yapsalar, o qadar yahşı olur", - dey asker.
Rusiye işğali başlağanından berli İrına göñülli olaraq çalışmağa başladı. Aqyarda ukrain arbiy qısımlarınıñ yanında canlı qalqan kibi turğanını hatırlay.
"O yerde bizim adamlarımız silâsız ediler, silâlar qapalı edi. Diger taraftan ise - silâlı ruslar. Bizler ücümden, küç qullanmağa qorqtıq", - dep ayta o.
Onıñ Qırımdaki talebesi olğan qızı, içtimaiy ağlardaki vatanperver fotoresimleri sebebinden zorbalıqqa oğradı.
"Rektor onı çağırttı, bütün regaliyalarını çıqardılar, soñra ise zorbalıq başlandı. O: "Men mında endi olamayım ve oqumağa istemeyim", - dedi İrına.
2014 senesiniñ küzünde İrına balalarını qıtağa alıp ketti: qızını - başqa universitetke, oğlunı ise anasınıñ yanına Harkiv vilâyetine. O, boş ayğa qadar işğal altında qaldı.
"Evden ketmek pek ağır edi. Qaytıp olamaycağıñ belli degil. Bu duyğularnı añlatmaq mümkün degil", - dey o.
İrına ilk sefer USQe qoşulmağa qomşusınen qonuşqan soñ qarar aldı, o, onı Rusiye teşviqat efsanelerine inandırdı.
"Slovyansk azat etilgen soñ, bilet alıp, "yerinden yoq etilgen şeer"ni körmege kettim. Anda yalıñız eki qazaiy kiosk bar edi. Bu meni deñiştirdi", - dep hatırlay İrına.
2014 senesi qadın uçaq-istihbaratqa kirmedi, çünki bu bölük onıñ ihtisasını talap etmedi. Onıñ yerine Kral Daniel adına 24-nci brigadada santalimatçı oldı.
"Dostım dedi ki: "Bizge pasportlar kerek, çünki ilâclar çetelden kele. Olarnı tertipke ketirmek kerek". Men razı oldım. Eki yıl santalimatçı olıp çalıştım", - dep tarif ete asker.
Cenk başlağanda o, kene cenkke qaytıp başladı: başta göñülli olaraq, 2022 senesi ise ava istihbaratı mektebinde oquy edi.
"Başta men Kıyivge ava aviatsiyası istihbaratı mektebine kettim, soñra daa bir mektepke oqumağa, soñra - Slovyanskqa tanışlarımğa kettim. Anda meni cenk şaraitinde ögrete ediler ve er şeyni ameliyat etmege yardım ete ediler", - dep ayta İrına.
2023 senesiniñ yazından itibaren o, 82-nci desant-ücüm brigadasında hızmet ete. Qadın dey ki, ukrain dronları tehnologiyasında ruslardan ögündedir.
"Rusiye operatorları aqqında aytmağa isteyim, olar aqılsız degiller, amma bizden çoq şey ögreneler, amma biz ögge ketemiz. Olarnıñ üstünligi tek sayısadır", - dep qayd ete askerler.
Cenk yılları devamında İrına çoq dostunı coydı, onıñ ğalebesi ise - sağ qardaşları. Ordu qadınları aqqında ayta: eñ müimi - motivatsiyadır.
"Orduda qadın, doğuruv odasında olğan qadın kibi: kimerine yarım daqqada doğurmaq qolay, kimerine üç künde küçü yeter. Orduda küçsizler içün ağır", - dep qoştı o.
İrınanıñ arzusı - işğalden azat etilecek Qırımğa qaytmaqtır.
"Men Fiolentte küçük bir topraq alıp, anda bir yımşaq kürsü qoyar edim ve saba qave içer edim. Amma bunı yapmaq içün ruslar evlerinde cenk nasıl olğanını bilmeli", - dep yekünley o.
Telegram, WhatsApp ve Facebookta Suspilne Qırım haberlerine abune oluñız