İşğal etilgen Sevastopolda (Aqyarda) Balıqlava Körfezine kirişinde bon bentleriniñ qurulması devam ete. İşlerni bu afta ilk qış ayınıñ 7-ne qadar bitirmege planlaştırıla.
Qırımnıñ cemaat telükesizligi idaresiniñ müdiri Oleksiy Krasnokutskıy buın bildirdi, dep yazdı RİA Novosti Qırım.
Onıñ aytqanına köre, bentler suv alanını diversantlardan ve deñiz dronlarından qorumaq içün kerek.
"Bunıñ 230-dan 60-ı endi suvğa tüşürildi, ilk qış ayınıñ 7-ne qadar bu iş yekünlenecek", — dedi Krasnokutskıy.
Bundan da ğayrı, o, Aqyarda tasil müessiselerinde beton sığınaqlarnıñ qoyulması ve camlarnıñ mahsus qoruyıcı zarnen örtülmesi yekünlendi, dep bildirdi.
Hatırlatamız ki, Balıqlava Körfezinde bon bentleriniñ qurulmasına azırlıq aqqında şeerniñ işğalli gubernatorı Mihail Razvojayev aytqan edi. O, bu manialarnı bozarğan aynıñ 23-nde Üç Quyuda Ava mudafaası sistemasınıñ işiniñ neticesinde tüşken raketa parçalarından soñ "Qanun çıqarıcı fevqulâde toplaşuvı"nda qabul etilgen telükesizlik tedbirlerinden biri olaraq adladı
Telegram, WhatsApp ve Facebookta Suspilne Qırım haberlerine abune oluñız