2024 senesi boş ayda uquq qorçalayıcılar Qırımdan elâk olğan 54 arbiy adamnıñ mersiyelerini taptılar. Eñ azdan 10 elâk olğan askerler Sevastopolda (Aqyarda) yerleşken 810 deñiz piyade brigadasından edi. Orta küz ayına baqqanda, mersiyelerniñ sayısı arttı - o vaqıt 42 haber qayd etildi.
"Tribunal. Qırım epizodı" uquq qorçalayıcı teşebbüsi Telegramda ilk qış ayınıñ 3-nde bunı derc etti.
"Beş vaziyette işğal etilgen topraqnıñ mobilizatsiya etilgen sakinleri cenk areketlerinde iştirak etkenini belgilemege imkân oldı. Cenkte bulunğanlarnıñ sayısı daa çoq ola bile, çünki bildirüvlerniñ aman-aman yarısında (46%) yarımada sakinleriniñ cenk areketleri alanında bulunğanları qayd etilmedi", — dep qayd ettiler uquq qorçalayıcı teşkilâtnıñ analitikacıları.
Eñ çoq elâk olğanlar Donetsk ve Kursk yönelişlerinde qayd etildi - er biri 9 mersiye. Aynı zamanda, boş ayda er üçünci "mezarlıq" Sevastopolğa (Aqyarğa) keldi.
Uquq qorçalayıcılarnıñ qayd etkenine köre, boş ayda Simferopolda (Aqmescitte) elâk olğan askerlerniñ sayısı 8 insanğa arttı. Evelki devirlerde böyle mersiyelerniñ sayısı sıfırdan ekige qadar edi.
Cenk vaqtında vatandaşlarnı qoruv aqqında Jenevre şartnamesiniñ 51-inci maddesi arbiy bölüklerge işğal etilgen topraqlarnıñ sakinlerini kirsetmege yasaq ete. Roma nizamnamesiniñ 8-inci maddesinde vatandaşlarnı işğal etken memleketniñ silâlı quvetlerinde hızmet etmege mecbur etüv arbiy cinayet sayıla.
Telegram, WhatsApp ve Facebookta Suspilne Qırım haberlerine abune oluñız