13 senege maküm etilgen Servet Gaziyevniñ tuvğanları Rusiye apishanesiniñ şartlarında sağlıq vaziyeti fenalaşqanını tarif etti. "Hizb ut-Tahrir" davasınıñ ekinci Aqmescit gruppasınıñ mabüsi koordinatsiya bozuluvı ve sağ qolunda duyulğan ağrıdan şikâyet etti.
Qırım birdemligine keçenlerde onen telefon vastasınen laf etken siyasiy mabüsniñ qardaşı Svitlana Ablâmitova bu aqqında haber etti.
"Şimdi onıñ sağ qolunda ağrı bar ve koordinatsiya bozuldı — parmaqları areket etmeyler, qalemni tutıp olamay. Onıñ içekler meseleleri peyda oldı", — dep tarif etti siyasiy mabüsniñ soy-sopı.
Bundan ğayrı, yaqın kelecekte Servet Gaziyevniñ apishaneden müstemlekege etapı planlaştırıla, dep haber etildi.
Hatırlatamız ki, 2021 senesi Rostov-na-Donu SİZOda siyasiy mabüs Servet Gaziyev mikroinsultnı yaşadı. Bundan soñ yüzüniñ sağ tarafı felç oldı. Kerekli tibbiy yardım kösterilmedi, bir qaç kün soñra onı apishanege alıp kettiler, anda o, maneviy ve bedeniy basqığa oğradı.
O vaqıt ekimler siyasiy mabüsniñ sağlığı yahşı olğanını ve yardımğa muhtac olmağanını bildirgen ediler. Advokat Emil Kurbedinovnıñ qayd etkenine köre, hastahanede onıñ belkemigine zarar ketirildi, bu ise Servet Gaziyevniñ sağlığını fenalaştırdı.
"Hizb ut-Tahrir davası"nıñ ekinci Aqmescit gruppası aqqında ne bilemiz
2019 senesi saban ayınıñ 27-sinde Qırımda qırımtatarlarnıñ evlerini kütleviy şekilde tinttiler. Aqmescit rayonınıñ Bavurçı, Mamaq, Yañı Abdal meskün yerlerinde taqiqat işleri yapıldı. İşğalciler, 20 qırımtatar adamını Hizb ut-Tahrir halqara siyasiy fırqasına ait olmakta qabaatlatıp tuttılar.
Rus mahsus hızmetleri daa üç insannı qıdırmağa ilân ettiler. 2019 senesi saban ayınıñ 28-inde Rusiyeniñ Rostov vilâyetiniñ Aqsay şeerinde daa üç qırımtatar adamını tutqanını bildirdiler. Tutulğan adamlar arasında "Qırım birdemligi"niñ içtimaiy jurnlisti Osman Arifmemetov da bar edi.
Aynı kün işğal etilgen Aqmescitteki Kıyiv rayon makemesi, tutulğan adamlarnı tevqif etip maküm etti.
2019 senesi yaz mevsiminde "Hizb ut-Tahrir davası"nıñ bu gruppasında tutulğan insanlarnıñ sayısı 25ke arttı. Tutulğanlar arasında "Qırım birdemligi" içtimaiy uquq qorçalayıcı areketiniñ faalcileri çoq edi. Olar, Qırımda siyasiy sebepli taqipler fedalarını qorçalamağa yönelten faal işinen bellilerdi. Olar arasında uquq qorçalayıcılar, içtimaiy jurnalistler ve gönüllüler bar.
Çoq bilgi olğanı sebebinden işğalciler 25 iştirakçinen cinaiy davanı beşer gruppağa böldiler.
2022 senesi boş aynıñ 24-ünde Rostov-na-Donudaki Cenübiy bölge arbiy makemesi, davanıñ iştirakçilerini terror faaliyetinde ve akimiyet zapt etmekte qabaatlı tanıdı. Enver Ametov ve Yaşar Müedinov 13 senege, içtimaiy jurnalistler Roslan Süleymanov, Rustem Şeyhaliyev ve Osman Arifmemetov 14 senege maküm etildi. Siyasiy mabüsler dört sene apishanede geçirecek soñ bir sene areket sıñırlanmaları astında olacaqlar. Qabaatlanğan adamlar öz qabaatını tanımadılar ve taqip etilgenlerini siyasiy olğanını tüşüneler.
Hizb ut-Tahrir, islâm siyasiy fırqasıdır. 2003 senesi Rusiyede o, terrorcı bir teşkilât olaraq tanındı, oña bağlı olğan insanlarnı ise taqip etmege başladılar. İştirakçileri, "qanunlarğa qarşı faaliyet"te ve böyle degen "cian hilâfeti"ni yaratmağa ıntılmağa qabaatlanalar. 2014 senesi Qırım işğal etilgen soñ işğalcilerniñ qanunları zapt etilgen Qırımda da qullanılmağa başlandı. Qırımlı musulmanlarnı da Hizb ut-Tahrirge bağlı olmaqta qabaatlamağa başladılar, böylece yarımadanıñ işğaline qarşı olğanı sebebinden qırımtatarlarğa basım arttı.
Telegram, WhatsApp ve Facebookta Suspilne Qırım haberlerine abune oluñız