Rostov-na-Donu şeerindeki Rusiye Cenübiy bölgeniñ arbiy makemesi, Memet Lümanov, Aziz Azizov, Rustem Osmanov ve Mustafa Abduramanovnıñ davasında birinci makeme oturışını keçirdi. Makeme oturışında qanunsız apis etilgenlerniñ er biri qabaatlavnen razı olmağanını bildirdi.
Bunı "Qırım birdemligi"ne advokat Edem Semedlâyev bildirdi.
O qayd etkenine köre, Memet Lümanov, Aziz Azizov, Rustem Osmanov ve Mustafa Abduramanov, cinaiy davanıñ bütün delilleri taqdim etilecek soñ, öz fikirlerini tafsilâtlıca bildireceklerini bildirdiler.
Aynı vaqıtta oturışta qabaatlanğanlarnıñ tuvğanları diñleyiciler olaraq iştirak ettiler.
"Oğlanlar soy-soplarını körgenlerinden pek quvandılar. Avağa, buzğa ve qarğa baqmadan, 700 kilometrden keldiler. Olarnıñ avtobusı da bozulğan edi", – dep tarif etti Edem Semedlâyev.
O şunı da qoştı ki, kelecek makeme oturışı ilk qış ayınıñ 16-na planlaştırıla.
"Hizb ut-Tahrir davası"nıñ altıncı Bağçasaray gruppasınıñ mabüsleri aqqında ne bilemiz
Saban ayınıñ 5-nde saba maalinde Bağçasaray ve Canköy rayonlarında uquq qorçalayıcılar 10 qırımtatarnıñ evinde tintüv keçirdiler. Aynı o künü makeme olardan dörtü - qırımtatar faalcileri Memet Lümanov, Aziz Azizov, Rustem Osmanov ve Mustafa Abduramanov içün tevqif tedbirini sayladı. Olarnı SİZOğa yolladılar.
Daa soñra makeme Canköy ve Canköy rayonınıñ tutulğan sakinlerini SİZOğa yolladı: Enver Halillayev, Nariman Ametov, Ali Mamutov, Cadra köy camisiniñ imamı Vahid Mustafayev ve Arsen Kaşka.
Sabıq imam Remzi Kurtnezirovnıñ hastalıqları sebebinden ev apsine alındı. Tutulğan on kişiniñ episi Rusiyede yasaq etilgen Hizb ut-Tahrir islâm firqasınıñ iştirakçisi ola. Tutulğanlarnıñ çoqusı, çoq balalı qorantalarnıñ babaları ola.
Hizb ut-Tahrir, islâm siyasiy fırqasıdır. 2003 senesi Rusiyede o, terrorcı bir teşkilât olaraq tanındı, oña bağlı olğan insanlarnı ise taqip etmege başladılar. İştirakçileri, "qanunlarğa qarşı faaliyet"te ve böyle degen "cian hilâfeti"ni yaratmağa ıntılmağa qabaatlanalar. 2014 senesi Qırım işğal etilgen soñ işğalcilerniñ qanunları zapt etilgen Qırımda da qullanılmağa başlandı. Qırımlı musulmanlarnı da Hizb ut-Tahrirge bağlı olmaqta qabaatlamağa başladılar, böylece yarımadanıñ işğaline qarşı olğanı sebebinden qırımtatarlarğa basım arttı.
Telegram, WhatsApp ve Facebookta Suspilne Qırım haberlerine abune oluñız