Vaqtınca işğal etilgen Aqyarda patlamalar duyula ve Ava mudafaası sisteması çalışa. Şeerniñ işğalli akimiyeti "USQniñ birleşken ücümini toqtatmağa devam etkeni" ve tüşürilgen uçucısız aletlerniñ sayısı yedige arttı, dep bildirdi.
Boş aynıñ 27-nde şeerniñ işğalli gubernatorı Mihail Razvojayev Telegram kanalında bunı bildirdi.
Böylece, Rusiye nezaretindeki gubernator Aqyarnıñ Şimaliy tarafında eki ava maqsadınıñ urulğanı, Qaçı rayonında eki dron yoq etilgeni, Mamaşay rayonında Qara deñizniñ üzerinde daa eki uçucısız alet urulğanı ve Qaçı qara yolu yanında viraneler tüşkenini yaza. Pobeda parkında daa bir dron tüşürildi.
Suspilne Qırımğa bergen izaatında yerli sakin bildirgenine köre, telüke ilâñ etilmedi — o, bir qaç patlamadan soñ ilân etildi.
Daa soñra Rusiye Mudafaa nazirligi, yerli vaqıtnen saat 8:30-10:30 arasında Qara deñiz ve işğal etilgen Qırım toprağında 25 ukrain uçucısız aleti tüşürilgenini bildirdi.
İşğalli gubernator Ravojayevniñ "Vkontakte" ağında uçucısız aletlerniñ ücümleri aqqında yazğanları altında insanlar, mektep talebeleri sığınaqqa keçsin dep, ava telükesini ilân etmege rica ettiler.
Hatırlatamız ki, boş aynıñ 27. sabası vaqtınca işğal etilgen Aqyarda ava telükesi ilâñ etildi. Rusiye kontrolindeki akimiyet Ava mudafaası sisteması işlegenini ve eki uçucısız alet tüşürilgenini bildirdi. Ava telükesi lâğu etilgen soñ patlamalar devam etti.
Telegram, WhatsApp ve Facebookta Suspilne Qırım haberlerine abune oluñız