12 senege maküm etilgen ağır hasta vatandaş jurnalisti, qırımtatar Amet Süleymanov sağlıq vaziyeti fenalaşqanını bildirdi. Qırım siyasiy mabüsi yürek ağrılarını çekip tura. Bundan da ğayrı o, yüksek qan basımı ve nefes qıtlığından zarar köre. Er kün o daa beter ola.
Onıñ apayı Lilâ Lümanova, Vladimir apishanesinde (Rusiye) onı ziyaret etken advokatnıñ malümatına esaslanıp, "Qırım birdemligi" cemaat teşkilâtına bildirdi.
Oña köz çilteriniñ angiopatiyası diagnozı qoyuldı. Bu çiletniñ qan damarlarınıñ zararlanmasıdır, onıñ qan teminatı bozula. Hastalıq körlikniñ sebebi ola bile.
Aynı vaqıtta Süleymanov Qırımnıñ işğalli Sağlıq nazirliginiñ onı yürek klapanını deñiştirmek içün nevbetten çıqarğanına açuvlandı. Onı apishaneniñ hadimi tasdıqladı. Lümanova şimdi Moskvadan ameliyat aqqında cevap beklegenini bildirdi.
Bundan da ğayrı, siyasiy mabüs, qorantasınıñ telefonlarını açmağa rica etti, amma alâ daa izin almadı. Bu sebepten qorantasınen bağ tutmaq içün tek bir yol — mektüp yazmaqtır.
Mayıs ayında olğan hipertonik kriziden sebep Süleymanovnıñ burnu devamlı qanay, başı sıq-sıq aylana, nefes qıtlığı bar. Hronik yürek meseleleri de qan damarlarına tesir etti. Kreml mabüsi bir ay devamında ömür arqadaşınıñ yollağanı ilâclarnı bermege tırışa edi.
Şimdi qırımtatarğa yürek ağrısı ve qan basımı içün ilâclar berile, amma qara cigerine yardım etken ve qannı seyreltken ilâclar berilmey. Ekimler oña qannı seyreltken ilâclar bermege başladılar, amma birazdan olarnı lâğu ettiler. Aynı zamanda olar siyasiy mabüsniñ apayına onıñ ilâcları ne içün lâğu etilgenini aytmadılar.
Amet Süleymanov aqqında ne bilemiz
Süleymanov – 2014 senesi Rusiyeniñ Qırımnı qanunsız işğalinden soñ evlerniñ tintilmeleri ve qırımtatarlarnıñ tutulmaları aqqında haber bergen "Qırım birdemligi" içtimaiy jurnalistidir.
O, qalpnıñ qırmızı qan damarı ve mitral kemligini çeke. Siyasiy mabüsniñ apayı Lilâ haber berdi ki, aqayı operatsiya nevbetinde tura. Bundan ğayrı, o qayd etti ki, onıñ içün apishanede bulunmaq, "ölüm demektir".
Bundan ğayrı, qırımtatarnıñ saqatlığı bar, amma 2015 senesi Moskvada ameliyattan red etkeni sebebinden o lâğu etildi, çünki muntazam tarzda teddaviylegeni Kıyivde ameliyat yapacaq edi.
2020 senesi saban ayınıñ 11-inde işğal etilgen Qırımnıñ Bağçasaray şeerinde rus quvetçileri, evini tinttiler ve neticesinde o tutuldı. 2023 senesi çiçek ayınıñ 5-ine qadar Süyelmanov, qalp hastalığı sebebinden, ev tevkifi astında buluna edi.
Qorçalayıcı tarafnıñ qırımtatarnıñ sağlıq alına dair çoq ilânlarına baqmadan, Rovtov-na-Donudaki Cenübiy bölge arbiy makemesi onı 12 senege maküm etmege qarar berdi.
Avropa Şurasınıñ Parlament Assambleyasınıñ (AŞPA) maruzacısı, rusiye akimiyetini qanunsız olaraq tevqif etilgen jurnalist Amet Süleymanovnı azat etmege çağırdı.
2023 senesi arman ayında onı Vladimirdeki 2-nci Rusiye apishanesi olğan "Vladimir merkezi"ne etap ettiler.
2024 senesi oraq ayında Rusiye Federatsiyasınıñ Vladimir vilâyet makemesi qırımtatarnıñ apishaneden azat etilüvini red etti, onıñ eki hastalığı olsa da, onı tüzetüv müessiselerinde tutmaq mümkün degil.
2024 senesi orta küz ayınıñ soñunda Qırımnıñ işğalli Sağlıq nazirligi onı yürek klapanını deñiştirmek içün ameliyat nevbetinden çıqardılar. Onıñ adı beklev cedveline kirsetildi.
Sağlıq nazirliginiñ işğalli vekilleri Süleymanovnıñ "ameliyatı aqqında qarar alınması içün mütenasip vesiqalarnen şahsen kelmesi"ni talap etti. Onıñ apayı Lilâ Lümanova Qırımnıñ işğalli prokurorlığına şikâyet yazdı.
Telegram, WhatsApp ve Facebookta Suspilne Qırım haberlerine abune oluñız