"Sarı şerit" cemaat areketiniñ faalcileri işğal etilgen Qırımnıñ Aqyar civarında yerleşken Baydar yaylasınıñ eñ yüksek noqtası olğan İlyas Qayada Ukraina devlet bayrağını köterdiler.
Areket öz Telegram kanalında bu aqqında haber etti.
"Ukrainlerniñ 10 yıllıq işğalden soñ bile qırılmazlığınıñ daa bir delili", — dep bildirildi.
Bundan da ğayrı, faaller, cumaaqşamı künü, boş aynıñ 21-de, Azatlıq ve Menlik Kününe qadar, vaqtınca işğal etilgen topraqlarda ukrain vatandaşlarınıñ vatandaşlıq tirenüvine qol tutmaq içün "Sarı şerit" umumukrain aktsiyasını keçireceklerini ilân ettiler.
Hatırlatamız ki, evel "Sarı şerit" areketiniñ faalcileri Yaltada Rusiye işğalcileriniñ ateş noqtalarına barıp, Rusiye akimiyetine qarşılıq timsallerini tarqattılar.
Bundan ğayrı, "Sarı şerit" areketiniñ faalcileri işğal etilgen topraqlarnıñ, şu cümleden Qırımnıñ, sakinleri içün stresli şaraitte ruhiy sağlıqnı qorçalamaq içün üç ruhiy usulnı derc ettiler.
Bundan da ğayrı, bu areket "Dovidka.info" leyhasınen beraberlikte "Sen Ukrainadasıñ" adlı bedava VPNnen mahsus bir brauzer ve hızmetni VİETnıñ, şu cümleden Qırımnıñ, sakinleri içün azırladı. Bu, ukrain saytlarını ve haberlerni telükesiz surette baqmağa imkân berecek.
Telegram, WhatsApp ve Facebookta Suspilne Qırım haberlerine abune oluñız