İşğalli Rusiye akimiyeti çeşit gruppalı saqatlı 7 qırımtatarnı qanunsız olaraq müstemlekler, SİZO ve apishanelerde tuta.
Bunı Qırımtatar Maaliy Merkezi (QMM) bildirdi.
Uquq qorçalayıcılarnıñ malümatına köre, qanunsız tutulğanlar arasında:
- Zekirya Muratov — 3. gruppa saqatlığı;
- Oleksandr Sizikov — 1. gruppa saqatlığı;
- Timur İbragimov — 3. gruppa saqatlığı;
- Servet Gaziyev — 2. gruppa saqatlığı;
- Amet Süleymanov — 3. gruppa saqatlığı;
- Timur Yalkabov — 3. gruppa saqatlığı;
- Remzi Kurtnezirov, 2. gruppa saqatlığı, şimdi ev apsinde buluna.
“Bu insanlar pek ağır hastalar. SİZO ve apishanelerniñ yaramay şaraiti, sağlığı aqqında şikâyetlerniñ red etilüvi, yaramay ve vaqtında berilmegen tibbiy yardım sebebinden olarnıñ sağlığı fenalaşıp tura”, — dep QMM haber berdi.
Uquq qorçalayıcılar işğal etilgen Qırımda beden ve aqıl sağlığınıñ eñ yüksek seviyesine irişüv aqqı bozulğanını qayd ete.
Böylece, QMMniñ malümatına köre, 2024 senesiniñ 9 ayı devamında eñ azdan 40 böyle bozuv qayd etildi, 36-sı — qırımtatarlarğa qarşı. 2023 senesiniñ aynı devirinde 40 (31) bozuv ve 2022 senesinde ise 25 (24) bozuv qayd etildi.
“Bu areketlerinen Rusiye Federatsiyası siyasiy mabüslerniñ eñ yüksek seviyeli bedeniy ve ruhiy sağlıq aqqını boza. Rusiye Federatsiyasınıñ qanunlarına köre, ağır hasta insanlar apisten azat etilmeli, çünki insan ayatı — eñ yüksek qıymettir, üküm ölümge çevirilmemeli”, — dep QMM qayd etti.
Uquq qorçalayıcılar yuqarıda qayd etilgen şahıslar ve başqa siyasiy mabüslerniñ deral azat etilmesini, em de işğal etilgen Qırımda insan aqlarınıñ bozulmasını toqtatmasını talap ete.
Telegram, WhatsApp ve Facebookta Suspilne Qırım haberlerine abune oluñız