Ukraina Adliye nazirligine şikâyet arizasına dair vesiqalar ya da Eskender Bariievniñ davası boyunca dava açılması aqqında malümat kelmedi.
Adliye nazirliginiñ Suspilne Qırımnıñ muracaatına bergen cevabında aytıla.
Berim ayında Eskender Bariiev, qırımtatarlarnıñ Meclisiniñ uquqiy statusını pekitüvde ükümetniñ areketsizligi sebebinden Kıyiv bölgesiniñ memuriy makemesinde dava açtı.
Adalet nazirliginiñ cevabı orta küz ayınıñ 30-nda berildi. Suspilne Qırım onı şimdi derc ete, çünki onı boş aynıñ 12-nde aldı. Anda şunı da qayd eteler ki, "yuqarıda qayd etilgen vesiqalarnı alacaq soñ, Adliye nazirligi Ukraina Nazirler Kabinetiniñ işbu arizanen bağlı uquqiy nazar noqtasını şekillendirecek ve Ukraina Memuriy makeme Qanunnamesinde belgilengen tertipte makemege protsessual vesiqalar ve deliller taqdim etecek".
2023 senesi bozarğan aynıñ 5-nde Meclis qırımtatar halqınıñ temsiliy organı olaraq Meclisniñ uquqiy statusını belgilemek içün Ukraina Qavmiy siyaset ve vicdan serbestligi devlet hızmetine vesiqalar paketini berdi. Hızmet vesiqalarnı qabul etti ve Nazirler Kabinetine yolladı. O yılnıñ orta küz ayından itibaren ükümet vesiqalarnı baqa.
Ukrainanıñ "Tamır halqları aqqında" qanunına binaen, tamır halqlarınıñ temsil organını meydanğa ketirmege aqqı bar, oña tamır halqlarını temsil etmek ve olarnıñ adından qarar qabul etmek aqqı berile.
Telegram, WhatsApp ve Facebookta Suspilne Qırım haberlerine abune oluñız