Ukraina Silâlı quvetleriniñ Arbiy-deñiz quvetleriniñ komandanı, vitse admiral Oleksiy Neyijpapa, "ububat koridorı" ve Qara deñizniñ telükesizligini temin etken ADQniñ taqımınıñ gemi ve kater taktik gruppalarınıñ azırlığını teşkerdi.
USQniñ Arbiy deñiz quvetleriniñ Facebook saifesinde bu aqqında haber etildi.
"Duşmanğa qarşılıq kösterüvniñ quvetleştirüvi ve diversiyağa qarşı mudafaanıñ eyileştirüvi – esas vazifelerimizdir. Duşman bir qaç kere bizim topraq suvlarımızğa kirmege tırıştı, amma arbiy deñizcilerniñ işbirligi neticesinde ıntıluvları muvafaqiyetsiz oldı. Telüke erte tapmaq ve toqtatmaq alâ daa müimdir. Arbiy gemilerimizniñ erkânları, hususan, duşmannıñ vatandaşlarnı qorqutmaq içün qullanğanları kamikaze dronlarınen yapılğan ava ücümlerini toqtatalar", – dep qayd etti vitse admiral Oleksiy Neyijpapa.
Ukraina SQniñ Arbiy-deñiz quvetleriniñ komandanı gemilerniñ komandanlarınen beraber telükelerge tez cevap bermek ve yüksek seviyede arbiy azırlıqnı saqlamaq kibi müim meselelerni muzakere etti.
"Azırlıqnıñ devamlı inkişafı arbiy deñizcilerge yañı çağıruvlarğa tez alışmağa imkân bere. Aynı zamanda, subet devamında qoşma resurslar ve maddiy-tehnikiy teminatnıñ eyileştirilmesinde bir sıra ihtiyaclar qayd etildi", – dep bildirdi vitse admiral Oleksiy Neyijpapa.
Bundan da ğayrı, Ukraina SQniñ Arbiy-deñiz quvetleriniñ komandanı vazifelerini becergen arbiylerni taqdirledi ve er bir arbiy deñizciniñ qaramanlıq hızmeti ve işke sadıqlığı içün teşekkür bildirdi.
Telegram, WhatsApp ve Facebookta Suspilne Qırım haberlerine abune oluñız