İşğalciler siyasiy mabüs Amet Süleymanovnı yürek klapanını deñiştirüv ameliyatı cedvelinden çıqardılar. Ağır hasta olğan qırımtatar adamı acele ameliyatqa muhtac, lâkin Qırımnıñ işğalli Sağlıq nazirligi, Süleymanovnıñ ameliyatqa nevbette olmağanını onıñ ömür arqadaşına bildirdi. Onıñ adı beklev cedveline kirsetildi.
Bunı "Qırım birdemligi" bildirdi.
Amet Süleymanovnıñ ömür arqadaşı berim ayınıñ başında Rusiye kontrolindeki Qırım Sağlıq nazirligine muracaat yolladı. Qadın aqayınıñ ameliyat nevbetinde bulunğan yerini bilmege istedi. Onıñ aytqanına köre, Amet Süleymanovnı 2021 senesiniñ soñunda qayd ettiler.
İşğalli nazirlikniñ vekili telefon etip, Süleymanovnıñ apayınıñ mektübi kelgenini bildirdi.
“Ve söz arasında Ametniñ beklev cedvelinde olğanını ayttı", — dedi Lilâ Lümanova.
Bu deñişmelerniñ sebebini ögrenmek içün, "nazirlikniñ" cevabı ise 30 kün içinde berilgen edi, siyasiy mabüsniñ apayı Rusiye kontrolindeki Qırım prokuraturasına şikâyet yazdı.
“Bundan da ğayrı, 2022 senesi berim-orta küs aylarında aynı sağlıq nazirliginden maña telefon etip, onıñ nevbeti ameliyatqa kelişkenini ve bir-eki aydan soñra azır olmaq kerek olğanını ve yılnıñ soñuna qadar oña muracaat eteceklerini ayttılar. O vaqıt er şeyni yapıp olğanımızğa quvandıq. Amet [Cenübiy bögle arbiy makemesinden] izin aldı, teşkerüvge çıqtı. Biz onıñ bağırsaqlarını, dişlerini bütünley baqıp çıqtıq. Onı raat alıp, hastahanege qoya bile ediler", — dep ayttı Amet Süleymanovnıñ apayı.
Lâkin 2022 senesiniñ soñuna qadar "nazirlik"ten bir telefon da kelmedi.
“Kiçik-saban aylarında Sağlıq nazirligine telefon etip, ameliyat olacaqmı-yoqmı soradım. Bizge dediler ki: "Ebet, bu cedvelde bar, amma siz ameliyattan vazgeçtiñiz". Bizler bir yañlış añlaşuv olğanını tüşündik. Belki de birisi bizim yerimizden cevap berdi. Ve biz daa bekleycekmiz, dep emin edik", — dedi Lilâ Lümanova.
Arman ayında o, Vladimir merkezinde Amet Süleymanovnıñ evine kelip, ekimlernen yürek klapanını deñiştirmege añlaştı. Mında, muracaat Moskovağa yollanılğanı aqqında aytıla, lâkin onıñ baqılması içün vaqıt belgilenmedi.
Amet Süleymanov aqqında ne bilemiz
Süleymanov – 2014 senesi Rusiyeniñ Qırımnı qanunsız işğalinden soñ evlerniñ tintilmeleri ve qırımtatarlarnıñ tutulmaları aqqında haber bergen "Qırım birdemligi" içtimaiy jurnalistidir.
O, qalpnıñ qırmızı qan damarı ve mitral kemligini çeke. Siyasiy mabüsniñ apayı Lilâ haber berdi ki, aqayı operatsiya nevbetinde tura. Bundan ğayrı, o qayd etti ki, onıñ içün apishanede bulunmaq, "ölüm demektir".
Bundan ğayrı, qırımtatarnıñ saqatlığı bar, amma 2015 senesi Moskvada ameliyattan red etkeni sebebinden o lâğu etildi, çünki muntazam tarzda teddaviylegeni Kıyivde ameliyat yapacaq edi.
2020 senesi saban ayınıñ 11-inde işğal etilgen Qırımnıñ Bağçasaray şeerinde rus quvetçileri, evini tinttiler ve neticesinde o tutuldı. 2023 senesi çiçek ayınıñ 5-ine qadar Süyelmanov, qalp hastalığı sebebinden, ev tevkifi astında buluna edi.
Qorçalayıcı tarafnıñ qırımtatarnıñ sağlıq alına dair çoq ilânlarına baqmadan, Rovtov-na-Donudaki Cenübiy bölge arbiy makemesi onı 12 senege maküm etmege qarar berdi.
Avropa Şurasınıñ Parlament Assambleyasınıñ (AŞPA) maruzacısı, rusiye akimiyetini qanunsız olaraq tevqif etilgen jurnalist Amet Süleymanovnı azat etmege çağırdı.
Telegram, WhatsApp ve Facebookta Suspilne Qırım haberlerine abune oluñız