Kanadadaki bir universitet tamır halqlarını, hususan qırımtatarlarnı, tedqiq etecek alimler içün programma başlattı. Birinci stipendiat qırımtatar Nara Narimanova oldı. 2014 senesi qadın işğal etilgen yarımadadan Kıyivge köçti, bu sene ise Alberta universitetiniñ milliy tedqiqatlar fakultetine kirdi.
Nara Narimanova Qırım ve onıñ tamır halqınıñ tarihını dünyağa nasıl añlatacağı aqqında planlarını Suspilne Qırımnen paylaştı.
"Men qırımtatar halqınıñ siyaseti, tili, medeniyetini ve umumen qırımtatarlarnıñ ukrain cemiyetiniñ kerçeklerinde zemaneviy baqışlarını tedqiq etecegim", — dep Nara Narimanova ayttı.
Nara Narimanova bu sene Kanadada Alberta universitetiniñ qırımtatar studiyalarında birinci stipendiat oldı.
"Bu teşebbüs — dünyada birinci ola, böyle doktoranturalar iç bir yerde yoq, hususan qırımtatar tamır halqınıñ tetqiqatı boyunca, bu Alberta universiteti", — dep Narimanova añlattı.
Alberta universiteti Kanadanıñ eñ yahşı beş aliy oquv yurtunıñ sırasına kirdi. Anda kirmezden evel Nara eki yıl devamında AQŞnıñ Massaçusets universitetinde oquy edi.
"Men Amerika Qoşma Ştatlarınıñ tamır halqları mevzusında meraqlanam, amma bu mevzuda kursqa barmadım, siyasiy memuriyet, siyasiy idare ve memuriyet mevzusında. Men Ukraina liderlerine imkân bergen Fulbright programması sayesinde kettim, yani, Ukrainada deñişmeler yapqan insanlar, bu stipendiyanı ne içün qazanğanlarını bilmek içün, men Massaçusetske kettim", — dep qayd etti o.
Narimanova qayd etti ki, tamır halqları mevzusını ögrenmek arzusı yoq olmadı. AQŞda eki yıl magistraturada oquğan soñ, oña doktoranturağa devam etmek imkânı berildi.
"Eñ yaqın dostum bu programmanı yolladı, ve dedi ki: "Şimdi bu programmağa kirmek içün yerler bar, bu programmanı keçmek ve oqumağa ketmek içün bütün imkânlarıñ bar". Men ise: "Okay, men kirecegim, bu pek yahşı olur", — dep tüşündim. Men bu stipendiyanı nail aldım, teşkerüvden keçtim, bütün fakultetim tamır halqlarından ibaret", — dep stipendiat qayd etti.
Kanadada qadın Ukraina tamır halqlarından biri olğan qırımtatar halqınıñ medeniyeti, tili ve tarihını araştırmağa ögrenecek. Nara Özbekistanda sürgün etilgen qırımtatarlarnıñ qorantasında doğdı. Qorantası Vatanı olğan Qırımğa qaytqan soñ, o, mektepte qırımtatar tilini oqumadı. Amma kelecek işi içün öz ana tilini seçti — Qırım müendislik-pedagogika universitetine qırımtatar ve ingliz filologiya fakultetine kirdi.
Qırımda Nara bir yıl devamında mektepte qırımtatar tilini ögretken edi, soñra qırımtatar neşirinde terciman ve jurnalist olıp çalıştı. 2014 senesi çiçek ayında Rusiye Qırımnı işğal etkeninden sebep yarımadanı terk etti. Alberta universitetinde Nara şimdilik qırımtatar tetqiqatlarınıñ tek stipendiatıdır.
"Bu yönelişte daa çoq çalışacaqmız ve Kanadada qırımtatar studiyalarınıñ inkişafı kerçekten de pek müim olğanını aytacaqmız. Qırımtatar mevzusınen meraqlanğan başqa insanlarğa Alberta universitetine oqumağa kirmege imkân bere bilemiz", — dep Narimanova qayd etti.
Nara Ukrainağa üç yıl içinde ilk sefer keldi. Tezden qadın Kanadağa qaytmağa planlaştıra. Doktoranturanı bitirecek soñ, Narimanova Alberta universitetiniñ tamır halqları bölüginde oca olmağa arzu ete. İşğalden soñ ise tuvğan Qırımğa kelmege arzu ete.
Telegram, WhatsApp ve Facebookta Suspilne Qırım haberlerine abune oluñız