"Serbest Qırımğa mektüpler" teşebbüsi çerçivesinde Yuriy Makarov, işğal etilgen Qırımdaki işğalci "makeme" tarafından sert rejimli müstemlekede 14 senege üküm etilgen "Qırım birdemligi" cemaat birleşmesiniñ strimeri, vatandaş jurnalisti Rustem Şeihaliyevniñ mektübini oqudı.
Ukraina Prezdentiniñ Qırımdaki Temsilcligi öz Telegram kanalında bu aqqında haber berdi.
"Yuriy Makarov — ukrain jurnalisti, televizion alıp barıcısı, vesiqalı yazıcısı, yazıcıso, Rustem Şeihaliyevniñ PEN Ukraina ve ZMINA "Solidarity Words" leyhası çerçivesinde mentorıdır. Şimdi Rustem Şeihaliyev tuvğan evinden 6 biñ kilometr uzaqlıqta, Rusiyeniñ Krasnoyarsk vilâyetiniñ 2. Yeniseysk apishanesinde buluna," — dep bildirildi.
Temsicilik qayd etti ki, istegen er kes teşebbüske qatıla bile.
"Bir mektüp yazıñız, dostlarıñız ve işdeşleriñizge aktsiya aqqında haber beriñiz, içtimaiy ağlarda paylaşıñız. Bu adiy adımlar vatandaşlarımızğa, er angi maniağa baqmadan, olarnıñ serbestligi içün küreşkenimizni añlatmağa yardım etecek. Muqavemet devam ete!" — dep Temsilcilik qayd etti.
"Hizb ut-Tahrir" islâm siyasiy firqası tek Rusiye toprağında terrorist olaraq tanındı, çünki bu teşkilâtnıñ azaları musulmanlarğa qarşı repressiyalar sebebinden işğalli akimiyetni muntazam sürette tenqit ete ediler. Aynı zamanda Hizb ut-Tahrir dünyanıñ memleketleriniñ çoqusında, şu cümleden Ukrainada serbest areket ete.
"Hizb ut-Tahrir davası"nıñ ekinci Aqmescit gruppası aqqında ne bilemiz
2019 senesi saban ayınıñ 27-sinde Qırımda qırımtatarlarnıñ evlerini kütleviy şekilde tinttiler. Aqmescit rayonınıñ Bavurçı, Mamaq, Yañı Abdal meskün yerlerinde taqiqat işleri yapıldı. İşğalciler, 20 qırımtatar adamını Hizb ut-Tahrir halqara siyasiy fırqasına ait olmakta qabaatlatıp tuttılar.
Rus mahsus hızmetleri daa üç insannı qıdırmağa ilân ettiler. 2019 senesi saban ayınıñ 28-inde Rusiyeniñ Rostov vilâyetiniñ Aqsay şeerinde daa üç qırımtatar adamını tutqanını bildirdiler. Tutulğan adamlar arasında "Qırım birdemligi"niñ içtimaiy jurnlisti Osman Arifmemetov da bar edi.
Aynı kün işğal etilgen Aqmescitteki Kıyiv rayon makemesi, tutulğan adamlarnı tevqif etip maküm etti.
2019 senesi yaz mevsiminde "Hizb ut-Tahrir davası"nıñ bu gruppasında tutulğan insanlarnıñ sayısı 25ke arttı. Tutulğanlar arasında "Qırım birdemligi" içtimaiy uquq qorçalayıcı areketiniñ faalcileri çoq edi. Olar, Qırımda siyasiy sebepli taqipler fedalarını qorçalamağa yönelten faal işinen bellilerdi. Olar arasında uquq qorçalayıcılar, içtimaiy jurnalistler ve gönüllüler bar.
Çoq bilgi olğanı sebebinden işğalciler 25 iştirakçinen cinaiy davanı beşer gruppağa böldiler.
2022 senesi boş aynıñ 24-ünde Rostov-na-Donudaki Cenübiy bölge arbiy makemesi, davanıñ iştirakçilerini terror faaliyetinde ve akimiyet zapt etmekte qabaatlı tanıdı. Enver Ametov ve Yaşar Müedinov 13 senege, içtimaiy jurnalistler Roslan Süleymanov, Rustem Şeyhaliyev ve Osman Arifmemetov 14 senege maküm etildi. Siyasiy mabüsler dört sene apishanede geçirecek soñ bir sene areket sıñırlanmaları astında olacaqlar. Qabaatlanğan adamlar öz qabaatını tanımadılar ve taqip etilgenlerini siyasiy olğanını tüşüneler.
Telegram, WhatsApp ve Facebookta Suspilne Qırım haberlerine abune oluñız