İşğalli Qırım akimiyeti yerli "arbiy komissarlıqlar"ğa "mobilizatsiyadan qaçqanlar"ğa qarşı cinaiy davalar açmağa emir etti, soñra ise olarğa basqı yapıp, makemeden evelki añlaşma çerçivesinde Rusiye Mudafaa nazirliginen Ukrainada cenk alanında hızmet etmek içün añlaşma imzalamağa talap etti. Bundan da ğayrı, "arbiy komissarlıqlar" ve "polis"ke, bu "müessiseler"niñ qabarcılığı aqqında çoq haberler peyda olğanı sebebinden, askerlik içün tibbiy eyyetler üzerinde nezaretni sertleştirmege emir etildi.
#LiberateCrimea halqara vatandaşlıq kampaniyasınıñ faalcileri Qırım "arbiy komissarlıqları"ndaki menbalarına atfı etip, orta küz ayınıñ 9-nda Qırım.Aqiqat saytında bunı bildirdiler.
Olarnıñ malümatına köre, orta küz ayınıñ 2-nde Rusiye prezidenti "mobilizatsiyadan qaçqanlar"nı tapmaq ve cinaiy davalarnı açmaq içün qanun bazasını imzaladı.
"Sebepleri añlaşılır — Ukrainağa qarşı cenkleşmege istegen qırımlılarnıñ sayısı ep azlaşa", — dep qayd ettiler faalciler.
Vatandaşlar kampaniyasınıñ iştirakçileri bildirdiler ki, "arbiy komissarlıqlar"ğa Rusiye ordusınıñ umumiy sayısını arttırğanı sebebinden şimdiki mobilizatsiya kampaniyası çerçivesinde daa çoq adamnı çağırmağa emir etildi.
Bundan da ğayrı, Qırım "arbiy komissarları"nıñ "toplaşuvı"nda askerlikke çağırılğan tibbiy eyyetlerni qabarcılıq sebebinden daa çoq nezaret etmege emir etildi.
"Meselâ, Sudaqta eki metr qadar mazallı bir oğlan, bergi müessisesi hadiminiñ oğlu tibbiy eyyetnen añlaşıp, beyaz bilet aldı, dep maqtana. Ve bir sıra misal bar. 2022 senesi Qırımnıñ sabıq Rusiye komissarı Yuriy Lımar bu sebepten tutuldı, amma bu saada qabarcılıq devam ete – tek «beyaz biletlerniñ» fiyatı arttı», – dep qayd ettiler faalciler.
Hatırlatamız ki, orta küz ayında Qırımda Rusiye ordusına daa bir qanunsız küz çağıruvı başlandı. Qırım "arbiy komissarı" Yevhen Maşukovnıñ malümatına köre, işğalciler 18-30 yaşlarında olğan tahminen 2 biñ qırımlını askerlikke çağırmağa planlaştıralar. Aynı zamanda Ukraina Tış işleri nazirligi işğalcilerniñ bu areketlerine narazılıq bildirdi.
Ukraina makemeleri Qırımdaki arbiy cinayetler ve Ukraina milliy havfsızlığı esasları bozulğanı içün 200den çoq üküm çıqardı. İşğalli akimiyetniñ arbiy cinayetlerinden biri – Ukraina vatandaşlarınıñ Rusiye ordusına mecburiy mobilizatsiyasıdır, dep bildirdi QMC ve Aqyar şeeriniñ prokurorlığınıñ yolbaşçısı İhor Ponoçovnıy.
Hatırlatamız ki, Rusiye askerleri işğal etilgen Aqmescit, Herson vilâyetiniñ Geniçesk ve Luhansk şeerlerinde yañı teşviqat levhaları ve stendlerni yerleştirdiler, dep bildirdi "Anti Z" vatandaşlıq muqavemet areketi.
Telegram, WhatsApp ve Facebookta Suspilne Qırım haberlerine abune oluñız