Ulyanovsk vilâyetindeki apishaneden Rusiye müstemlekesine "Hizb ut-Tahrir davası"nıñ ekinci Aqmescitniñ gruppasınıñ iştirakçisi, faalci ve uquq qorçalayıcı Rustem Seithalilov çıqarıldı. Seithalilov 14 senege üküm etildi.
"Qırım birdemligi" cemaat teşkilâtına onıñ ömür arqadaşı Elzara Seithalilova bunı bildirdi.
Onıñ aytqanına köre, Rustemni berim ayınıñ 24-nde saba alıp kettiler, ertesi künü ise o, "Zonatelekom" resmiy bağını qullanıp, oña Kazan şeerinden telefon etti.
"Rustem maña telefon etip, şimdi Kazan şeerinde olğanını ayttı. Tezden olarnı Kirovğa, soñra Voloğdağa alıp ketecekler. Bu onıñ bilgenidir. Olarnı qayerge ketireceklerini daa bilmeyim", — dedi Elzara.
Rustem Seithalilov aqqında ne bilemiz
2019 senesi saban ayınıñ 27-nde Qırımda Aqmescit civarındaki Bavurçı, Mamaq ve Yañı Abdal köylerinde kütleviy tintüvler keçirildi. Tutulğan qırımtatarlar arasında Rustem Seithalilov da bar edi.
2022 senesi saban ayınıñ 18-nde Cenübiy bölge arbiy makemesi Seithalilovnı 14 senege üküm etti. 2023 senesi oraq ayında Moskvadaki istinaf makemesi bu ükümni tasdıqladı.
25 qırımtatar faalcisi, şu cümleden Seithalilov, Rusiyede terroristik sayılğan "Hizb ut-Tahrir" islâm firqasınen alâqaları bar olğanında qabaatlandı.
Tutulğanlarnıñ çoqusı "Qırım birdemligi" uquq qorçalayıcılar birleşmesiniñ azalarıdır. Olarnıñ bir qısmı terroristik teşkilâtnıñ faaliyetini teşkil etüv maddesinde qabaatlana (yaşağan müddetke qadar apis cezası), başqaları ise böyle faaliyetlerde iştirak etüvde (20 senege qadar apis cezası). Olarnı ükümetni zorbalıqnen zapt etüvde qabaatlap oldılar (10 senege qadar apis cezası).
Telegram ve Facebookta Suspilne Qırım haberlerine abune oluñız