Qırımtatar halqınıñ lideri Mustafa Cemilev Qırım platformasınıñ sammitinde çıqışta bulunıp, Qırımnıñ işğalden qurtarıluvı halqara kün tertibinde olmalı, dep bildirdi.
Bunı Mustafa Cemilev Facebook saifesinde yazdı.
Onıñ aytqanına köre, ukrain topraqlarınıñ, hususan Qırım yarımadasınıñ, Rusiye işğalcilerinden bütünley azat etilmesi — tamır sakinlerinde "Qırım cenkniñ vaqtınca toqtatılması içün Rusiyenen ticaret yapmaq içün deñişüv para birlemi olmaycağına" işanç doğura.
"Bu eñ evelâ Qırımnıñ tamır halqı içün pek müimdir. Olar, belli olğanı kibi, işğalni aman-aman yüz faiz tanımadı, ve endi 10 yıldan çoq Qırımnı Ukrainanıñ ayırılmaz parçası dep sayalar ve bu sebepten işğalciler tarafından eñ büyük basqılarğa oğraylar", — dep qayd etti Mustafa Cemilev.
Qırım platformasınıñ dörtünci sammiti aqqında ne bilemiz
Sammit vaqtında Litvaniya prezidenti Gitanas Nauseda, onıñ memleketi Rusiyege halqara uquqqa riayet etmege ve işğal etilgen topraqlarda ealini, şu cümleden qırımtatarlarnı taqip etmesini toqtatmağa talap etecek, dep bildirdi.
Aynı zamanda Ukraina prezidenti Volodımır Zelenskıy çıqışta bulunğanda qırım siyasiy mabüsleriniñ ve işğalciler tarafından qanunsız olaraq apiske alınğan Ukraina vatandaşlarınıñ adlarını añdı.
Türkiye prezidenti Recep Tayyip Erdoğan ileride "qırımtatar türkleriniñ aqlarını pekitmek içün qoşma adımlar atılmasını" beklegenini ayrıca qayd etti.
Qırım platforması — Ukrainanıñ teşebbüsinen Qırım meselesini kün tertibine qaytarmaq, insan aqlarını qorçalamaq, yarımadanıñ işğalden qurtarılmasına yardım etmek, Avropa ve global havfsızlığını pekitmek içün halqara idare mehanizmidir.
Telegram ve Facebookta Suspilne Qırım haberlerine abune oluñız