İşğal etilgen Qırımda qırımtatarlar, hususan tuvğanları Ukraina Silâlı quvetleriniñ askerleri olğanlarnıñ evleri tintile.
Bunı Qırım uquq qorçalayıcı gruppasınıñ idare yolbaşçısı Olha Skrıpnık Suspilne Qırımğa bildirdi.
Onıñ qayd etkenine köre, böyle tintüvler 2024 senesi mart ayında başlandı.
"O vaqıt FSB hadimleri añlattılar ki, olar bağlanmamalılar, özlerine malümat bermemeliler, bunı casuslıq kibi körmek mümkün. Añlaymız ki, olarda ayrı baqılğan insanlarnıñ cedvelleri bar, bu askerlerniñ qorantaları ve Ukrainanıñ başqa devlet hadimleri içün qoşma telükedir", — dep Skrıpnık qayd etti.
Onıñ qayd etkenine köre, bu insanlar işğalli akimiyetniñ reineleridir. Skrıpnık qoştı ki, bu işğalcilerniñ standart taktikasıdır.
"Şimdi cedvellerni yañıdan yañarta bileler, çünki bu iş devamlı yapıla ve olar qırımtatar qorantalarına ilk sefer kelmeyler", — dep qoştı o.
Aynı zamanda "Tribunal. Qırım epizodı" uquq qorçalayıcı teşebbüsiniñ "Irade" uquq qorçalayıcı teşebbüsiniñ vekillerine esaslanıp bildirgenine köre, berim ayınıñ 4-nde bu kibi tintüvler Qırım Muhtar Cumhuriyeti ve Aqyar şeeri sakinleriniñ aqlarını qorçalav ombudsmeniniñ vekili vazifesini eda etken İsmail Halikovnıñ ana-babasınıñ evinde keçirildi. İşler onıñ USQde hızmet etkeni aqqında malümatnen bağlı.
"Soñki vaqıtları tarqalğan adetlerge baqmadan, bu sefer "maska şouları" evge ücüm etip, er kesni yerge urmadılar. Tintüv qararını oqudılar ve atta "cemaat vekilleriniñ" kerçek barlığını temin ettiler, olar, adet üzre, tek kâğıtta qayd etile. Tintüv neticesinde bir cep telefonu tutıp alındı", — dep bildirildi.
QUQGnıñ idaresiniñ yolbaşçısı emin ki, uquq qorçalayıcılarnıñ böyle areketleri insanlarğa qarşı basqıdır.
"Bu kerçekten basqı şeklidir, çünki biz añlaymız ki, bu, ilk evelâ, bir işarettir, demek ki, biz siziñ qalemiñizde barmız. Em de bu bir telüke ola bile, ve er daqqada böyle insanlarğa qarşı uydurılğan davalar açıla bile", — dep Skrıpnık tüşüne.
Telegram ve Facebookta Suspilne Qırım haberlerine abune oluñız