Arman ayınıñ 15-den 16-na keçer gecesi işğal etilgen Keriçte yerli sakinler patlamalar eşitken ediler. Rusiye Mudafaa nazirligi Qara deñiz üzerinde beş uçucısız aletni yoq etkenini bildirdi.
Yerli sakin Suspilne Qırımğa bu aqqında haber etti.
"Saba saat üçte şeerde küçlü patlamalar duyuldı. Üç-beş patlama eşittim. Şimdi deñiz vokzalı yanındaki Sovetskaya soqağı qapatıldı. O yerge parçalar tüşti", — dep añlattı o.
Aynı vaqıtta Rusiye Mudafaa nazirligi Telegramda Qara deñiz üzerinde beş uçucısız aletni yoq etkenini bildirdi. Bundan da ğayrı, nazirlik, Rusiye askerleri Qırımğa ketken eki taqımsız katerni yoq etkenini iddia etti.
"Hızmet etken Ava mudafaası quvetleri, Qara deñizde beş uçucısız alet zapt etip, yoq ettiler. Bundan ğayrı, Qara deñizde hızmet etken ateş vastaları, Qırım yarımadasına ketken eki taqımzsız katerni yoq ettiler", — dep Rusiye Mudafaa nazirligi bildirdi.
Bundan da ğayrı, "Qırım yeli" Telegram kanalı işğal etilgen Qırımda yanğınnıñ fotoresimlerini yayınladı.
Ukraina Mudafaa quvetleri, işğal etilgen Qırımdaki patlamalarnı tefsir etmediler.
Telegram ve Facebookta Suspilne Qırım haberlerine abune oluñız