Apishanelerde ruslar, kerekli tibbiy yardım bermemege devam eteler. 17 ve 13 senege maküm etilgen eki qırımtatar adamı Azamat Eyüpov ve Ruslan Nagayev böyle vaziyetke oğradılar. Bu meseleniñ çezilmesi içün ukrain ombudsmanı Dmıtro Lubinets, dünya cemaatına muracaat etti.
Arman ayınıñ 12-de Ukraina Yuqarı Şurasınıñ insan aqları vekâletlisi öz Telegram kanalında bunı bildirdi.
Şu cümleden, 61 yaşındaki siyasiy mabüs Azamat Eyüpov Rusiye apishanesinde hastahanege yatqızılmayıp ve ekimlerniñ nezareti olmadan endi dört kere işemik qalp krizini yaşadı. Onıñ alı er kün fenalaşa.
Aynı zamanda Rusiyeniñ Çelâbinsk vilayetiniñ Verhnöuralsk şeerindeki apishanede bir buçuq senedir Ruslan Nagayev büyrek ağrıları ve yüksek qan basımına şikâyet ete, amma kerekli tibbiy yardım oña kösterilmey.
"Rusiyege tesir etmesi, Ukraina vatandaşlarınıñ aqlarınıñ qaba bozmalarına muqavemet köstermesi ve qanunsız olaraq tutulıp qapatılğan ukrain vatandaşlarını azat etmege talap etmesi içün dünya cemaatına muracaat etem!", — dep Lubinets qayd etti.
O qoştı ki, bu kibi vaqialarnıñ sayısı arta. Bundan da ğayrı, rus apishanelerinde ukrain siyasiy mabüsleriniñ ölümi qayd etile. Şu cümleden, uzun vaqıt devamında hasta olğan, amma kerekli tibbiy yardım alamağan Cemil Ğafarov ve Kostântın Şırinğ.
"Jenevre şartnamesine binaen, bu işkenceler olaraq tanıla ve ayat aqqını boza", — dep ombudsman qayd etti.
Azamat Eyüpov aqqında ne bilemiz
2021 senesi kiçik aynıñ 17-sinde Qarasuvbazarda kütleviy tintüvler vaqtında qırımtatar adamı tutuldı.
Oña RF CQniñ 205.5. maddesiniñ birinci qısmını (terrorcılıq faaliyetini teşkil etüv) berdiler ve RFda yasa etilgen, amma dünyanıñ çoq ülkesinde, şu cümleden Ukrainada, serbest şekilde areket etken "Hizb ut-Tahrir" islâm siyasiy fırqasına ait olmaqta qabaatlaylar.
2022 senesi oraq ayında Rostov-na-Donudaki Cenübiy bölge arbiy makemesi, Eyüpovnıñ ağır sağlık alını esapqa almadı ve 17 senege maküm etti. Siyasiy mabüs, birinci üç sene epishanede geçirmeli. Apellâtsiya makemesi, bu qararnı tanıdı.
Qırımtatar adamını tibbiy baqmaları içün advokatı Emil Kurbedinov, taiqat izolâtorına hitap etti. Feldşer, osteohondroz diagnozı berdi ve asğariy tedaviylevnen kameraya qaytardı.
2023 senesi oraq ayında aqrabalarınıñ parasınen şahsiy ekimler Eyüpovnı baqtılar, onıñ qorçalayıcısı buna irişmege ıntıla edi. Mustaqil ekimler qayd ettiler ki, SİZOda maznun dört koronar qap krizini yaşadı ve acelen hastahanege yatmalı.
Ruslan Nagayev aqqında ne bilemiz
Aluştadan iş adamı Ruslan Nagayev "Hizb ut-Tahrir davası"nıñ Aluşta gruppasınıñ mabüsidir. Onı ve daa dört qırımtatar adamını 2019 senesi bozarğan aynıñ 10-nda tintüvlerden soñ tutıp, Rusiyede terroristik sayılğan, amma dünyanıñ çoqusı ülkesinde, şu cümleden Ukrainada serbest faaliyet etken İslâm siyasiy firqası Hizb ut-Tahrirde iştirak etkeninde qabaatladılar.
Ruslan Nagayev 13 senege üküm etildi. Moskva vilâyetiniñ apellâtsiya arbiy makemesi qararını deñiştirmedi.
Hizb ut-Tahrir islâm siyasiy firqası tek Rusiyede terrorist olaraq tanındı, çünki bu teşkilâtnıñ azaları musulmanlarğa qarşı repressiyalar içün işğalli akimiyetni muntazam sürette tenqit ete ediler. Aynı zamanda Hizb ut-Tahrir dünyanıñ çoqusı ülkesinde, şu cümleden Ukrainada serbest çalışa.
Telegram ve Facebookta Suspilne Qırım haberlerine abune oluñız