"Serbest Qırımğa mektüpler" teşebbüsi çerçivesinde İsmail Qurt-Umer Şaban Umerovnıñ mektübini oqudı. Şaban Umerov "Hizb ut-Tahrir davası"nıñ ekinci Aqmescit gruppasınıñ iştirakçisidir. İşğalli akimiyet, adamnı 18 sene sert rejimli müslemlekede qalmasına üküm etti.
Prezidentniñ Qırım Muhtar Cumhuriyetindeki Temsilciligi Telegramda bu aqqında haber etti.
Olar hatırlattılar ki, Şaban Umerovnı işğalciler siyasiy mabüslerniñ makeme oturışlarına barğanı, qanunsız olaraq maküm etilgen qırımtatarlarğa berilüvlerni teşkil etmege yardım etkeni, em de faal cemaat ve diniy faaliyeti içün maküm etken ediler. "Makeme" oña 18 sene sert rejimli müstemlekede qalmasına üküm etti.
"Şimdi Şaban Umerov Rostov vilâyetiniñ Rusiye apishanesinde buluna. Anda siyasiy mabüs qorqunçlı şaraitte, tuvğan evinden uzaq tutula, ve Şaban vatandaşlarınıñ destegine pek muhtac", — dep Temsilcilik qayd etti.
Temsilcilik hatırlattı ki, istegenler Ukraina tarafdarı olğanları ve Qırımnıñ Rusiye işğaline qarşı çıqqanları içün qanunsız apiske alınğan Şaban Umerov ve başqa Kreml mabüslerine qoltutuv sözlerini yaza bileler.
Nasıl qatılmaq mümkün?
— Ukraina Prezidentiniñ Qırım Muhtar Cumhuriyetindeki Temsilciliginiñ saytında siyasiy mabüslerniñ cedvelini ve olarnıñ tutuluv yerleriniñ haritasını baqıñız.
— Mektüp yazıñız: özüñizni tanıtıñız, özüñiz aqqında biraz aytıp beriñiz ve ne içün yazmağa qarar alğanıñıznı aytıñız. Etrafıñızda ve dünyada olıp keçkenlerni yazıñız, filmler, kitaplar, seyaatlar, tabiat, iş aqqında. Duygusal ya da komik ikâyelerni aytıñız, teessuratlarıñıznı paylaşıñız.
ZMINA saytında mektüp yazmaq qaideleri aqqında daa çoq malümatnı ögrene bilesiñiz.
İstegeniñiz vastanen mektüp yollañız
Poçta adresi (yollanuvı yollayıcınıñ masrafları ögünde):
— İnsan aqları aqqında malümat merkezi, a/s V-539, m. Kıyiv, 01001.
— Email: Free.CrimeaUA@gmail.com.
Hatırlatamız ki, Rusiye tarafından qanunsız tutulğan siyasiy mabüslerge qoltutmaq içün teşkil etilgen "Serbest Qırımğa mektüpler" aktsiyası 2024 senesiniñ soñuna qadar devam ettirildi.
"Hizb ut-Tahrir davası"nıñ ekinci Aqmescit gruppası aqqında ne bilemiz
2019 senesi saban ayınıñ 27-sinde Qırımda qırımtatarlarnıñ evlerini kütleviy şekilde tinttiler. Aqmescit rayonınıñ Bavurçı, Mamaq, Yañı Abdal meskün yerlerinde taqiqat işleri yapıldı. İşğalciler, 20 qırımtatar adamını Hizb ut-Tahrir halqara siyasiy fırqasına ait olmakta qabaatlatıp tuttılar.
Rus mahsus hızmetleri daa üç insannı qıdırmağa ilân ettiler. 2019 senesi saban ayınıñ 28-inde Rusiyeniñ Rostov vilâyetiniñ Aqsay şeerinde daa üç qırımtatar adamını tutqanını bildirdiler. Tutulğan adamlar arasında "Qırım birdemligi"niñ içtimaiy jurnlisti Osman Arifmemetov da bar edi.
Aynı kün işğal etilgen Aqmescitteki Kıyiv rayon makemesi, tutulğan adamlarnı tevqif etip maküm etti.
2019 senesi yaz mevsiminde "Hizb ut-Tahrir davası"nıñ bu gruppasında tutulğan insanlarnıñ sayısı 25ke arttı. Tutulğanlar arasında "Qırım birdemligi" içtimaiy uquq qorçalayıcı areketiniñ faalcileri çoq edi. Olar, Qırımda siyasiy sebepli taqipler fedalarını qorçalamağa yönelten faal işinen bellilerdi. Olar arasında uquq qorçalayıcılar, içtimaiy jurnalistler ve gönüllüler bar.
Çoq bilgi olğanı sebebinden işğalciler 25 iştirakçinen cinaiy davanı beşer gruppağa böldiler.
2022 senesi boş aynıñ 24-ünde Rostov-na-Donudaki Cenübiy bölge arbiy makemesi, davanıñ iştirakçilerini terror faaliyetinde ve akimiyet zapt etmekte qabaatlı tanıdı. Enver Ametov ve Yaşar Müedinov 13 senege, içtimaiy jurnalistler Roslan Süleymanov, Rustem Şeyhaliyev ve Osman Arifmemetov 14 senege maküm etildi. Siyasiy mabüsler dört sene apishanede geçirecek soñ bir sene areket sıñırlanmaları astında olacaqlar. Qabaatlanğan adamlar öz qabaatını tanımadılar ve taqip etilgenlerini siyasiy olğanını tüşüneler.
Hizb ut-Tahrir — islâm siyasiy firqasıdır. 2003 senesi Rusiyede bu teşkilât terror teşkilâtı olaraq tanındı, onıñ iştirakçileri taqip etildi. İştirakçilerni "anayasağa qarşı faaliyet"te ve "dünya halifeligini" meydanğa ketirmek ıntıluvında qabaatlaylar. 2014 senesi Qırım işğal etilgen soñ işğalciler öz qanunlarını işğal etilgen Qırımğa da tarqattılar. Qırım musulmanları da Hizb ut-Tahrirge alâqası bar olğanında qabaatlana ve yarımadanıñ işğaline razı olmağan qırımtatarlarğa qarşı basqını arttıra.
Telegram ve Facebookta Suspilne Qırım haberlerine abune oluñız