Rusiye Federatsiyasınıñ Ukrainağa qarşı cenkinde Qırımnen bağlı biñge yaqın insan elâk oldı. Amma bu tek qayd etilgen adiseler, Qırım sakinleriniñ kerçek sayısı daa çoq.
Qırımtatar Milliy Meclisiniñ başı Refat Çubarov Suspilne Qırımğa bergen intervyusında bunı añlattı.
"Qırımtatar cemiyetinde keçirilgen bazı cenazeler aqqında bilem. İmkân tapmağan, mobilizatsiyadan qaçıp olamağan ve öldürilgen qırımtatarlar defin etildi. Ve öldürilgen adamnı Qırımğa ketirip, defin ettiler. Bu kibi vaqialarda insanlar sıq-sıq kelmeyler, tek yaqınları kele, dep ayttılar. Bizimiz öz cenaze ananelerimiz bar, ve eger qayda olğanını bilseñiz, musulmannıñ cenaze merasimine barmaq borclusıñız. Amma insanlar anda barmamaq içün farqlı sebepler tapalar, çünki olar bu elâk olğan adam, nasıl olsa da, acınıqlı olğanını, lâkin mobilizatsiyadan qaçmaq kerek olğanını tüşüneler", — dep Çubarov qayd etti.
O şunı da qayd etti ki, 2022 senesi berim ayında, işğalciler Qırım sakinlerini celp etip başlağanda, biñlerce insan bundan qaçınmaq içün ketti. Amma qırımtatarlar içün çıqış yasaq etile.
"Qırımtatarlar içün bu bir felâkettir. Çünki Qırımdan çıqmaq bizim çevremizde maküm etile: "Ne içün böyle ola? O qadar zor qayttıq ki, on senelerce qaytmaq içün küreştik... Amma adamlarnıñ başqa çaresi yoq. Ya o cinayetçi olur, ya da o öldürüle. Facia şunda ki, o, silâ alıp, vatandaşlarına, ukrainlerge qarşı çıqtı. Birisini öldürgeni ya da öldürilgeni bir faciadır! Ana-babaları içün bir faciadır. Ve bunıñ episi toprağımıznı zapt etken barbarlarnen bağlı", — dep Çubarov hulâsa çıqardı.
Refat Çubarovnıñ Qırımnıñ azat etilüvi tez olacaq dep tüşüngenleri, yarımadanıñ 10 senelik işğali vaqtında nasıl deñişkeni, Meclisniñ Kıyivdeki vazifeleri ve Qırımğa qaytuv yolunı planlaştırğanı aqqında - yarın, bozarğannıñ 28-de, Suspilne Qırımnıñ saytında ve YouTube kanalında yayınlanacaq intervyuniñ tolu versiyasında tafsilâtlıca öreneceksiñiz.
Telegram ve Facebookta Suspilne Qırım haberlerine abune oluñız