İşğalli makeme, Qırımda Ukraina vatandaşını toprağından marum etmek içün böyle degen Aqyar prokurorlığınıñ ricasını yerine ketirdi.

Telegramda böyke degen Aqyar prokurorlığı bu aqqında haber berdi.

"Prokurorlıq"nıñ bilgilerine köre, ukrain vatandaşınıñ toprağı, Balıqlava rayonınıñ "Teremok" STniñ toprağında yerleşe ve meydanlığı 400 metr kvadrattır.

"Şimdiki topraq qanunlarına köre, sıñırğa yaqın topraqlarda, şu cümleden Aqyar şeerinde, ecnebiyler topraqqa saip olmazlar", — dep işğalciler bildirdiler.

Hatırlatamız ki, 2020 senesi RF akimiyeti qanun aldı. Oña köre, sıñırğa yaqın topraqlarda ecnebiyler topraqqa saip olmazlar. İşğalciler, böyle degen sıñırğa yaqın topraqlar cedveline deyerli bütün yarımadanı kirsettiler, rus pasportını almağan Ukraina vatandaşlarını ise ecnebiyler olaraq tanıdılar

Telegram ve Facebookta Suspilne Qırım haberlerine abune oluñız