13 senege maküm etilgen "Hizb ut-Tahrir davası"nıñ Üçünci Bağçasaray gruppasınıñ iştirakçisi, qırımtatar Rustem Seitmemetov Rusiyeniñ Ulyanovsk vilâyetiniñ Dimitrovğrad şeerindeki apishanede qalp krizini yaşağan soñ oña ameliyat yaptılar. Şu anda adlarını bilmegeni ilâçlarnı bereler ve sağlıq alı aqqında haber bermeyler.
Öz Telegram kanalında Yuqarı Şurasnıñ İnsan aqları temsili Dmıtro Lubinets bu aqqında haber berdi.
Ombudsman hatırlattı ki, ruslar Rustemni vaqtınca işğal etilgen Qırımda qanunsız olaraq tutalar. Onı 13 senege maküm ettiler. Keçenlerde belli olmağan sebeplerden adamnı ayrı kamerağa alıp ketirdiler. Lubinets bildirdi ki, apishaneniñ şartları Avropa cezalnadırıcı qaidelerine uyğun olmay.
UYŞnıñ temsili bildirdi ki, ısınmaq içün apis etilgen adamlar er vaqıt areket etmege ve beden vazifelerini yapmağa mecburlar. Beden vazifeleri sebebinden qırımtatar adamı bayıldı, birazdan ise oña qalp krizi diagnozını qoydılar.
Lubinets qayd etti ki, adamğa belli olmağan ilâçlarnı bereler, sağlıq alı ve analizleriniñ neticelerini bildirmeyler.
"Ukrain siyasiy mabüsleriniñ apishanelerdeki tutuv şartları, halqarar uquq qaidelerine uyğun olmay. Bu sebepten apis etilgen insanlarnıñ sağlığı zayıflaşa ve bu şartlarnı işkencelerge beñzetmek mümkün. Dünya cemaatını Rusiyeniñ insan aqlarını bozmalarına diqqat celp etmege çağıram", — dep Lubinets qayd etti.
Rustem Seitmemetov aqqında ne bilemiz
Rustem Seitmemetov — pedagog, evlengen soñ qurucı olıp çalışa edi. İşdeşleri ve iş bericileri onı işançlı ve cevapkâr adlandıralar. Tevqif etilmeden evel ailesi ve apayınıñ ana-babasıı baqqan edi.
2020 senesi saban ayınıñ 11. künü işğal etilgen Bağçasarayda rus quvetçileri, bir qaç qırımtatar adamınıñ evlerini tinttiler: Amet Süleymanov, Qırım birdemligi"niñ eski faalcisi olğan ve bir qaç sene Qırımdan ketmege mecbur olğan Seitumer ve qardaşı Osman Seitumerov, emcesi Rustem Seitmemetov.
2021 senesi orta küz ayında Rostov-na-Donudaki Cenübiy bölge arbiy makemesi Seitumer Seitumerov, Osman Seitumerov, Rustem Seitumerov ve Amet Süleymanovnı 17, 14, 13 ve 12 senege maküm etti.
İmaye etici taraf bildirdi ki, davanıñ bilgilerinde qabaatlanğan adamlarnıñ yanında silâ, patlayıcı malzemeler ve patlayıcı alet alğanları, terror aktını yapmağa planlaştırğanları ve başqalarını bunı yapmağa çağırğanlarını "delil etken bir şey yoq". Davanıñ bilgilerinde Bağçasaray camilerinde siyaset ve din muzakereleriniñ çıqarılğan sesleri bar.
2023 senesi çiçek ayında Seitmemetov apayına "Zonatelekom" apihane ağınen haber berdi ki, 15 kilogramğa azdı. Keçkende onı, Dimitrovğraddaki rus apishanesine etap ettiler.
Hizb ut-Tahrir, islâm siyasiy fırqasıdır. 2003 senesi Rusiyede o, terrorcı bir teşkilât olaraq tanındı, oña bağlı olğan insanlarnı ise taqip etmege başladılar. İştirakçileri, "qanunlarğa qarşı faaliyet"te ve böyle degen "cian hilâfeti"ni yaratmağa ıntılmağa qabaatlanalar. 2014 senesi Qırım işğal etilgen soñ işğalcilerniñ qanunları zapt etilgen Qırımda da qullanılmağa başlandı. Qırımlı musulmanlarnı da Hizb ut-Tahrirge bağlı olmaqta qabaatlamağa başladılar, böylece yarımadanıñ işğaline qarşı olğanı sebebinden qırımtatarlarğa basım arttı.
Telegram ve Facebookta Suspilne Qırım haberlerine abune oluñız