"Hizb ut-Tahrir davası"nıñ Üçünci Bağçasaray gruppasınıñ iştirakçisi Rustem Seitmemetov . Кримська солідарність

13 senege maküm etilgen "Hizb ut-Tahrir davası"nıñ Üçünci Bağçasaray gruppasınıñ iştirakçisi, qırımtatar Rustem Seitmemetov Rusiyeniñ Ulyanovsk vilâyetiniñ Dimitrovğrad şeerindeki apishanede qalp krizini yaşağan soñ oña ameliyat yaptılar.

Siyasiy mabüsniñ apayı Zera Sietmemetova "Qırım birdemligine" bu aqqında haber berdi.

Onıñ aqrabaları aytalar ki, mayıs ayınıñ 15. künü qırımtatar adamı özüni yaramay duydı. Bundan evel onı karantinge başqa, pek suvuq kamerağa alıp ketirdiler. Isınmaq içün Seitmemetov kameradaşlarınen beden vazifelerini yapa edi, amma birden bayıldı.

O zaman acele yardım tibbiyetçileri adamnıñ "şeker seviyesi artqanı"nı tüşünip, vilâyet qalp merkezine alıp ketirdiler. Hastahanede qırımtatarğa qalp krizi diagnozını qoyıp ameliyat yaptılar. Ameliyat 40 daqqa devam etti. Siyasiy mabüsniñ qan damarlarını stentleştirdiler, yani qannıñ qalbine maniasız keçmesi içün tarlaşqan qan damarını kenişlettiler.

Ameliyat yapqan soñ Seitmemetovnı Dimitrovğraddaki 9. SİZOnıñ apishane hastahanesine alıp ketirdiler. Anda oña nitroglitserin ve adlarını bilmegeni ilâçlarnı berdiler. Bundan ğayrı, analiz yapmaq içün onıñ qanını aldılar, basımını nezaret eteler, amma miqradını bildirmeyler. Bunı ne içün aytmağanına apishaneniñ ekimleri cevap bermege red ettiler. Aqşam maalinde Seitmemetovnıñ ateşi ola bile ve üşüp qaltıra bile. Aynı zamanda yardım almadan öz başına ketemez.

Rustem Seitmemetov aqqında ne bilemiz

Rustem Seitmemetov — pedagog, evlengen soñ qurucı olıp çalışa edi. İşdeşleri ve iş bericileri onı işançlı ve cevapkâr adlandıralar. Tevqif etilmeden evel ailesi ve apayınıñ ana-babasıı baqqan edi.

2020 senesi saban ayınıñ 11. künü işğal etilgen Bağçasarayda rus quvetçileri, bir qaç qırımtatar adamınıñ evlerini tinttiler: Amet Süleymanov, Qırım birdemligi"niñ eski faalcisi olğan ve bir qaç sene Qırımdan ketmege mecbur olğan Seitumer ve qardaşı Osman Seitumerov, emcesi Rustem Seitmemetov.

2021 senesi orta küz ayında Rostov-na-Donudaki Cenübiy bölge arbiy makemesi Seitumer Seitumerov, Osman Seitumerov, Rustem Seitumerov ve Amet Süleymanovnı 17, 14, 13 ve 12 senege maküm etti.

İmaye etici taraf bildirdi ki, davanıñ bilgilerinde qabaatlanğan adamlarnıñ yanında silâ, patlayıcı malzemeler ve patlayıcı alet alğanları, terror aktını yapmağa planlaştırğanları ve başqalarını bunı yapmağa çağırğanlarını "delil etken bir şey yoq". Davanıñ bilgilerinde Bağçasaray camilerinde siyaset ve din muzakereleriniñ çıqarılğan sesleri bar.

2023 senesi çiçek ayında Seitmemetov apayına "Zonatelekom" apihane ağınen haber berdi ki, 15 kilogramğa azdı. Keçkende onı, Dimitrovğraddaki rus apishanesine etap ettiler.

Hizb ut-Tahrir, islâm siyasiy fırqasıdır. 2003 senesi Rusiyede o, terrorcı bir teşkilât olaraq tanındı, oña bağlı olğan insanlarnı ise taqip etmege başladılar. İştirakçileri, "qanunlarğa qarşı faaliyet"te ve böyle degen "cian hilâfeti"ni yaratmağa ıntılmağa qabaatlanalar. 2014 senesi Qırım işğal etilgen soñ işğalcilerniñ qanunları zapt etilgen Qırımda da qullanılmağa başlandı. Qırımlı musulmanlarnı da Hizb ut-Tahrirge bağlı olmaqta qabaatlamağa başladılar, böylece yarımadanıñ işğaline qarşı olğanı sebebinden qırımtatarlarğa basım arttı.

Telegram ve Facebookta Suspilne Qırım haberlerine abune oluñız