İşğalciler, qırımlılarnıñ çalınmalarını taqip etmeycekler: uquq qorçalayıcılar Şemşedinovnıñ çalınmasını tefsir ettiler

Habersiz ğayıp olğan İsmail Şemşedinov. Фото надано родиною Шемшедінова

İşğal etilgen Qırımda eñ az bir aydır FSB işçileri qırımtatar İsmail Şemşedinovnıñ evini tintken soñ habersiz ğayıp olğan adamnı qıdıralar. Uquq qorçalayıcılar qayd ettiler ki, 10 senedir işğal devrinde Qırımda insanlarnı qanunsız olaraq tutıp qapatalar, rus taraflı akimiyet ise, bu vaqialarnı taqip etmege meraqlı degil.

"QırımSOS" CTnıñ analitiki Yevhen Yaroşenko Suspilne Qırımğa bunı añlattı.

"Bu, insannıñ işğalciler tarafından şaatlarnıñ ögünde közaltına alınğanı ve aynı zamanda tutuvınıñ akibeti ve yeri aqqında bilgi berilmegeni ilk qzoraki ğayıp oluv vaqiası degil. Misal içün, 2023 senesi boş ayda eki qırımtatar adamı tutuldı ve olarnıñ bulunğanı yer alâ daa belli degil. İşğalciler bildireler ki, olardan birinen bağlı bilgiler bar, faqat aqrabalarına bunı bildirmege red eteler", — dep ayttı o.

Yaroşenko qayd etti ki, işğal organları bir şey yapmalılar, amma Şemşedinovnıñ ailesi FSB, İİN ve arbiy prokurorlıqqa hitap etken soñ bile olarğa qırımtatar adamınen bağlı malümat bildirmediler.

"Buña köre ayta bilemiz ki, işğal orgamları, ayrıca quvet müesseseleri tarafından Qırımnıñ sakinleriniñ çalınmalarını taqip etmege meraqlı degil. Şunı añlamaq kerek ki, çalınma vaqialarınıñ sayısı bilgenimizden daa yüksek. Aqrabaları şiddetli şeylerni çekecekler dep, qorqaraq er bir aile, halq ögünde bunı bildirmege azır degil", — "QırımSOS" analitiki qayd etti.

Yevhen Yaroşenko, yaqın insanlarıñız çalınsa, qaysı müessiselerge hitap etmek kerekligini añlattı.

"Birinciden aqrabaları ihtisasiy ukrain müesseselerine ve halqara müessiselerge hitap etmeliler. Ukrain müesseseleri arasında Milliy malümat bürosı ve Mahsus vaziyetlerde habersiz ğayıp olğan kişiler meseleleri vekili. Halqara müesseseler arasında ise Halqara Qırmızı Haç Eyyeti, zoraki ya da göñülli olmağan ğayıplar meseleleri BMT", — dep Yaroşenko hulâsa çıqardı.

ZMINA İnsan aqları merkeziniñ leyhalarınıñ idarecisi Viktoriya Nesterenko qayd etti ki, İsmail Şemşedinovnıñ vaqiasında işğalcilerniñ onı tutqanınıñ sebebini aytmaq zor.

"Adetince, insanğa faal nazar noqtasını bildiremegenini köstermek içün faal insanlarnı — içtimaiy jurnalistlerni tutıp qapatalar. Amma İsmailniñ vaqiasında bir şey aytmaq zor, çünki o tibbiyetçi, masajcı olıp ve evde çalışa edi. Bunıñ içün onıñ işi faal olğanını aytmaq zor", — dep Nesterenko hulâsa çıqardı.

İsmail Şemşedinov aqqında ne bilemiz

2024 senesi qara qış ayınıñ 26-sıdnda İslâm Terek qasabasında FSB işçileri, 28 yaşındaki qırımtatar İsmail Şemşedinovnıñ evini tinttiler. Taqiqat tedbirini bitirgen soñ onı alıp kettiler.

Bugüngece ailesi, İsmailniñ bulunğanı yerni bilmey. Aqrabaları yardım almaq içün mustaqil advokatlarğa muracaat ettiler.

Telegram ve Facebookta Suspilne Qırım haberlerine abune oluñız