Qırımda işğalciler, qırımtatar Ametovnıñ ev müzeyini yañıdan tinttiler

Qırımtatar Milliy Meclisiniñ Suda bölgesiniñ başı İlver Ametov. Фото: Суспільне Крим

Qırımda işğalciler, Qırımtatar Milliy Meclisiniñ Suda bölgesiniñ başı İlver Ametovniñ ev müzeyini yañıdan tinttiler. Anda yigirmci senedir toplağanı eski silâ taqımı buluna.

Kiçik aynıñ 26-sınıñ aqşması "Qırım birdemligi"ne Ametov bu aqqında haber berdi.

Kiçik aynıñ 22-sinde Cumaaqşamı künü evini tinttiler. Qırımtatar adamına telefon etip, müzeyine ketmege rica ettiler. Anda işğal politsiyasınıñ hadimleri ve grajdanlıq urbasını kiygen onı bekley ediler. Olar "qanunsız şeyler"ni qıdıra ediler. Müzeyini tahminen beş saat devamında tintken soñ araştırma içün bir qaç demir aletni alıp çıqardılar.

"Menim "limomkalar"ım, patronlarım bar, amma olar episi boş. Men çoqtan olarnı boşattım", — dep Ametov añlattı.

O tüşüne ki, onıñ cemaat faaliyeti ve Meclisniñ bölge başı unvanı sebebinden onı taqip eteler.

"Men ondan vazgeçmem. Halq meni sayladı. Halq, kereksizligimni aytsa, men keterim", — dep Ametov qayd etti.

İlver Ametov aqqında ne bilemiz

Yarımada işğal etilgen soñ Sudaq iş adamı ve kollektsioneri İlver Ametovnıñ evini üç kere tinttiler, bir turist mevsiminde "Bazırğân" qavehanesini doquz kere tinttiler. O şaka ete ki, işğal quvetleriniñ işçileriniñ bir aydan çoq evini tintmege kelmegeninde kederlene, dep Suspilne Qırımğa añlattı.

Böylece, 2017 senesi mayıs ayında elektrik tayamalarını patlatmağa şübelep, işğal quvetçileri Amtovnıñ evini tinttiler.

2019 senesi berim ayınıñ 27-sinde ev müzeyini tintken vaqıt araştırmaq içün Qırımtatar Milliy Meclisiniñ azası şeadetnamesi, müzey eksponatları ve bazı vesiqalarını alıp çıqardılar.

Advokat Nazim Şeyhmambetovnıñ haber bergenine köre, Rusiye Cianiy Qanunnamesiniñ 280 maddesi (Aşırıcılıq faaliyetini yapmağa halq ögünde çağıruv), 282. maddesi (Nefret ve dumanlıq uyandıruv, insan itibarını aşlav) ve 238. maddesinde (Telükesizlik talaplarına uyğun olmağan aletler ve malzemelerni istisali, saqlanuv, ketirüv, iş yapuv ya da hızmet etüv) şübelenip, "taqiqattan evelki araştırma çerçivesinde" rus quvetçileri evini tinttiler.

Bundan soñ Qırım Muhtar cumhuriyetinin prokurorlığı, Ametovnıñ eviniñ qanunsız tintilüvleri sebebinden cinaiy dava açtı.

2020 senesi mayıs ayında işğal etilgen Sudaq şeer makemesi, qırımtatar adamına 150 biñ rublelik para cezasını bermege qarar aldı. Para cezası, onıñ iş faaliyetinen bağlı edi.

2020 senesi arman ayında "Sudaq şeer makemesi" silânı qanunsız olaraq saqlanğan Ametovnı qabaatlı tanıdı. Onı 8 ayğa maküm etti.

2020 senesi kiçik ayda işğal etilgen Qırım Yuqarı makemesi, Sudaq şeer makemesiniñ qararını lâğu etti ve davanı yañıdan baqmağa yolladı.

Telegram ve Facebookta Suspilne Qırım haberlerine abune oluñız