Altıncı qırımtatar tilinde online imlâ. Фото: Facebook/Nefes

Kiçik aynıñ 21-inde Halqara ana tili kününe bağışlanğan qırımtatar tilinde online imlâ altıncı kere keçerilecek.

Faalci, "Avdet" qırımtatar gazetasınıñ jurnalisti, imlânıñ idarecileri taqımınıñ azası, siyasiy mabüs Asan Ahtemov bu seneki online imlânıñ metnini yazdı. Keçken sene siyasiy mabüs, Qırımtatar Milliy Meclisiniñ başınıñ ilk muavini Nariman Celâl imlânıñ metnini yazdı.

Nasıl qatılmaq mümkün?

Yaş, millet, yer ve ülke, qırımtatat tili seviyesine daqmadan istegen er kes imlânı yaza bilir. Metin añlaşılı şekilde elnen ya latin, ya da kiril urufatınen yazılmalı.

Kiçik aynıñ 22-si saat 19:00ğa qadar iştirakçiler adını, şeerini, telefon nomerası ve içtimaiy ağlardaki saifesine bağlantınen imlânıñ fotoresimini ya da skankopiyasını elektron poçtağa yollamalılar.

"Nefes" cemaat teşebbüsi, maqbul tedbirni keçire. Olarnıñ Facebook saifesinde netice bildirilecek. Hata yapmaycaqlar mukâfatlandırılacaq.

Halqara ana tili kününe bağışlanğan qırımtatar tilinde online imlâ aqqında ne bilemiz

  • 1999 senesi kiçik aynıñ 17-sinde UNESCOnıñ Baş konferentsiyası Halqara ana tili kününi ilân etti. O vaqıttan berli bu kün kiçik aynıñ 21-inde qayd etile.
  • Qırımtatar tilinde online imlâ, na tilini destek etmege ve Qırımda siyasiy sebepli sahte davalar çerçivesinde qanunsız olaraq taqip etilgen faalciler aqqında hatırlatmağa yönelgen birlik aktsiyasıdır.
  • Bu aktsiya, 2019 senesi ilk qış ayınıñ 18-inde BMTnıñ Baş Assambleyasınıñ 74/135 "Tamır halqlarınıñ aqları" rezolütsiyasınen ilân etilgen Dünya tamır halqlarınıñ tilleriniñ halqara 10. seneliginiñ (2022 - 2032) maqsatları ve vazifelerine uyğundır.
  • 2022 senesinden başlap qırımtatar faalcileri Nariman Celâl, Asan Ahtemov, Aziz Ahtemovğa, yarımadada bütün siyasiy mabüslerge ve siyasiy sebeplerden taqip etilgenlerge maqbul senelik online imlâ bağışlana. 2021 senesi berim ayından berli Celâl ve Ahtemov qardaşları tevqif astında bulunalar.

Підписуйтеся на новини Суспільне Крим у Telegram та у Facebook